Tơ̆ 'măng hop akŏm, Hô̆i đŏng kon pơlei dêh char Gia Lai drơ̆ng nơ̆r hơlen dôm tơchơ̆t kăp gĭt đei: tơchơ̆t jên mong kơ tơring sơnăm 2025; Tơchơ̆t hơtŏk mŭk drăm tơpôl 5 sơnăm đơ̆ng 2026-2030; sut hŭt lê̆ tơchơ̆t gah sơnong tơm kĭ pơkăp tơdrong jang păng pơkăp jên huach pơm jang iŏk đơ̆ng jên mong teh đak lơ̆m tơring; hơmet tơplih minh tơchơ̆t gah pơkăp rim kơluăi teh păng pơkăp kơjă rim kơluăi teh sơnăm 2026; tơchơ̆t tơgŭm bơngai jang păng bơngai iŏk yua pơkăp grong soh atou lơ̆m tơring.

Gah pơkăp hơnih jang hanh chinh dôm jăl jang păng 1 sơnăm pơm jang kơ jơnŭm pơgơ̆r tơring 2 tăl, tơbang ah hop akŏm ăn tơbăt, adoi oei đei minh ƀar tơdrong tơnap tap. Hơdah lơ̆m noh đei minh ƀar hô sơ, hla bar chih răk tam mă đei pơdrơ̆ng tôm; tơdrong hlôh vao kloh klĕch đơ̆ng kang ƀô̆ lơ̆m iŏk sơnong jang 'nao oei kơđeh. Minh ƀar tơdrong oei kơƀah bơngai jang gah groi teh, ming man, jên hu, kơ̆ng ngê̆ thŏng tin păng tơplih kơmăi kơsô̆. Tơdrong jang tam mă đei pơjao ƀieen chê̆ hơdah đơ̆ng rŏng kơ hơgrop adoi pơm tơnap tap ăn tơdrong jang iŏk bơngai jang păng iŏk yua kang ƀô̆, bơngai jang tơ̆ xah.