Jĭ dêh char tơring groi kông, tơring sơlam păih Pơmơ̆t Tu, Sơn La đei vă jê̆ 275km trong sơlam hăm teh đak Cộng hoà Dân chủ Nhân dân Lào; kơsô̆ kon pơlei hloh 1,4 triệu ‘nu hăm 12 hơdrĕch hơdrŭng. Pôk pơ ư 6 jơnei mă dêh char iŏk đei lơ̆m khei ‘năr âu ki, ƀôh hơdăh ‘noh jĭ mŭk drăm - tơpôl sơđơ̆ng, cham char đei vei lăng, hơmet ming choh jang sa hơnơ̆ng năm trŏ trong, dôm tơdrong jang joh ayŏ, tơpôl păng vei lăng sơđơ̆ng tơdrong hơrih sa hơnơ̆ng đei bơngơ̆t ăn; Tổng Bí thư, Kơdră teh đak Tô Lâm pơma hơdăh, dôm jơnei âu tơƀôh jơhngơ̆m đon tơgoăt tơgoăl, kơchăng, hơdrin, jang tơnăp đơ̆ng Đảng bộ, khŭl kơdră, khŭl lĭnh, tơpôl anih mơdro sa păng Kon pơlei kơ rim hơdrĕch hơdrŭng dêh char Sơn La.

Ƀok athei dêh char Sơn La akŏm chĕp kơ̆l, pơgơ̆r 8 grŭp hơnăp jang tơm, lơ̆m noh kăl kơ lăng truh, chih hơdăh tơdrong jang hơtŏk tơiung păng tơbăt anih dơ̆ng đơ̆ng Sơn La lơ̆m tơring Pơmơ̆t Tu. Tơroi rơđăh tơdrong jang, athei iŏk hơtŏk tơiung kon bơngai, pơtho pơhrăm, sơđơ̆ng kon pơlei oei sa păng tơ jur dơnuh hin kơjăp pơm tơm, Tổng Bí thư, Kơdră teh đak tơtă, tơring ƀơ̆t măt athei hơmet ăn mă ‘lơ̆ng sơnăm hŏk 2026-2027, bơ̆jang kiơ̆ ‘lơ̆ng khăm jơhngơ̆m pran đĕch ăn kơ kon pơlei tŏ sĕt hloh 1 ‘măng 1 sơnăm.