Tơ̆ Đăk Lăk, đơ̆ng rŏng mĭnh khei tơlĕch jang tơdrong jang "30 măng năr" chih răk lơ̆m kơmăy kơsô̆ hơnăn tơring pơtăm păng hơnih tăh hơmet, truh dang ei dang 60% hơgăt teh păng kơsô̆ chih răk hlôi đei kơsô̆. Tơdrong jang đei bơ̆jang kiơ̆ đơ̆ng ‘năr 7/8 truh 7/9, akŏm dăr lăng, chih akŏm, hơmet pơ 'lơ̆ng păng chih tơmơ̆t dơ̆ng kơtơ̆ng ang hăm rim tơring pơtăm sâu riêng păng hơnih tăh hơmet. Rim khul bơ̆jang kơtă dăr lăng hơgăt teh, hơnih, bơngai vei lăng, hô sơ khôi luơ̆t păng tơdrong jang sa. 'Nâu ưh khan lăp jing tơdrong chih tơmơ̆t dơ̆ng kơsô̆, mă oei jing hơyak pơm pơ 'lơ̆ng kơtơ̆ng ang vă hơtŏk 'lơ̆ng đei yua vei lăng, pơvih pơvăn tơchă băt tơm a păng pơm lăp hăm 'meh vă đơ̆ng dôm anih tĕch mơdro tơ̆ teh đak đe. Ƀok Bùi Hồng Quý, Kơdră Anih vei lăng găh Choh jang sa păng Cham char dêh char Đắk Lắk, tơbăt:

“Anĭh vei lăng Chŏh jang sa păng Cham car hlôi pơjing 8 khŭl bơ̆ jang bơ̆jang kiơ̆ hơnăp jang âu păng kŭm athei dôm xăh, phường đei sầu riêng roi tơbăt, krao hơvơn kon pơlei vang jang pơjing mã kơsô̆ tơring pơtăm, jang hơdai hơdrin chĭh răk lơ̆m kơmăi kơsô̆ mã kơsô̆ tơring pơtăm. Anih jang kŭm gô hơnơ̆ng vang yak hơdai hăm rim tơring bơ̆jang kiơ̆ dôm hơnăp jang oei đei dơ̆ng."

Jang kiơ̆ Tơdrong tơchơ̆t 36/2026/NQ-CP, Anih tơm pơtrŭt choh jang sa Teh đak, Anih tơm vei lăng Choh jang sa păng Cham char pơgơ̆r pơhrăm ăn khul jang pơtrŭt choh jang sa găh pơm tơlĕch rơgoh 'lơ̆ng, pơjing mã kơsô̆ tơring pơtăm, tơchă băt tơm a păng pơm lăp hăm 'meh vă đơ̆ng anih tĕch mơdro tơ̆ Lâm Đồng. Dôm bơngai hŏk lăng hơlen tơdrong jang pơtăm gui yuăn să vă jê̆ 8.000 mét vuông tơ̆ xăh Phú Sơn Lâm Hà, đei pơtho pơm tơlĕch kiơ̆ trong VietGAP, iŏk yua trong tơruih đak kơtoh păng săy mơ̆r kơdih. Khul kŭm lăng hơlen mĭnh hnam kơmăi pơm tơlĕch gui yuăn đei kĕ pơm tơlĕch hloh 10.000 tân mĭnh sơnăm. Ƀok Lê Quốc Thanh, Kơdră vei lăng Anih pơtrŭt choh jang sa Teh đak pơma hơdăh: mưh tơring tơmam đei jang ‘lơ̆ng, tơmam đei băt hơdăh hơnih pơm tơlĕch, jang sa tơklep hăm pơm tơlĕch păng tĕch mơdro, tơdrong pơjei đơ̆ng tơmam choh jang sa đei Việt Nam gô đei hơtŏk ‘lơ̆ng.

“Pơtrŭt choh jang sa athei kơtă yak hơdoi hăm kon pơlei jang chŭn mir tơ̆ chŭn na. Athei tơplih đơ̆ng đon tơchĕng pơjao ki thuơ̆t jing đon tơchĕng mŭk drăm choh jang sa, vang jang lơ̆m đĭ đăng dôm tơdrong. Bơ̆n athei đei tôm dôm tơdrong gơh jang, gô đei dôm tơdrong jang, lăm pơtho, pơhrăm vă jing dôm bơngai pơtrŭt choh jang sa gơh hơgei. Băt truh tơdrong hlôh vao anih tĕch mơdro, hlôh vao găh jang hơdai păng pơgơ̆r tơgŭm kon pơlei jang chŭn mir vang jang lơ̆m dôm trong jang hơp tak xăh”.

'Nao âu, Anih vei lăng Chŏh pơtăm păng Vei lăng ‘long pơtăm, Anih tơm vei lăng Choh jang sa păng Cham char tơbăt Anih jang Hải quan Trung Quốc hlôi kĭ ăn dơ̆ng 567 mã kơsô̆ anĭh tăh hơmet păng tơring pơtăm sâu riêng gơ̆h tĕch mơdro tơ̆ tĕh đak Trung Quốc. Lơ̆m noh đei 401 mã kơsô̆ tơring pơtăm păng 166 mã kơsô̆ anĭh tăh hơmet. Kiơ̆ đơ̆ng nŏh, tơgop tơdrong hơtŏk kĕ tĕch sâu riêng tơpăt tơ̆ tĕh đak Trung Quốc, hơdai hăm pơjing tơdrong hiôk vă rim tơring, anĭh mơdro sa păng kon pơlei pơgơ̆r dơ̆ng chŏh jang sa, răt iŏk, tăh hơmet păng tĕch tơ̆ teh đak đe, mă kăl ‘noh jĭ lơ̆m khei 'năr Tây Nguyên yak mơ̆t lơ̆m khei 'năr phĕ tĕch.

Đơ̆ng dôm kơsô̆ găh kơsô̆ chih răk tơ̆ Đăk Lăk, dôm tơdrong jang pơm tơlĕch 'lơ̆ng tơ̆ Lâm Đồng truh tơdrong pơih să kơsô̆ gơh tĕch ăn teh đak Trung Quốc, gơh ƀôh choh jang sa Việt Nam tŏk bŏk ƀrư̆ ƀrư̆ tơplih đơ̆ng tơm. 'Noh jĭ tơplih đơ̆ng trong pơm tơlĕch, trong vei lăng truh trong gơh băt hăm anih tĕch mơdro; đơ̆ng pơm tơlĕch kơdih kơdih jing jang hơdai, đơ̆ng lăng kăl kơsô̆ tơmam jing lăng kăl tơdrong 'lơ̆ng păng kơjă kăp gĭt. 'Nâu kŭm jing mĭnh lơ̆m dôm tơdrong tơƀôh hơdăh đơ̆ng tơdrong jang Việt Nam yak tŏk lơ̆m chăl 'nao: kơchăng iŏk yua kơmăy kơmŏk, hơtŏk 'lơ̆ng bơngai jang, pơgơ̆r dơ̆ng pơm tơlĕch păng pơm lăp 'lơ̆ng hloh dôm tơdrong hơgăt đơ̆ng anih tĕch mơdro apŭng plĕnh teh.