Sơnăm ou oh Nguyễn Ngọc Minh Tâm tơ̆ pơlei Brang, xah sơlam Ia Púch, tŏk lăm 7. 'Nou jĭ 'măng mă blŭng oh hơtaih đơ̆ng unh hnam, oei tơ̆ hnam trưng teh đak rong 'me păng hơtuch giĕng pơtơm gơh vih tơ̆ hnam. Sơnăm hŏk 'nao, hŏk tơ̆ hnam trưng 'nao tôm tơdrong, hŏk pơhrăm hiôk hloh, pơchơt pơsuh pơm ăn oh Tâm hưch hanh hloh: “Inh chơt hơ-iă mơ̆t hŏk sơnăm hŏk 'nao kơlih inh gơh chă hŏk lơ tơdrong hlôh vao, lơ môn hŏk păng đei jơ năr rơvơn vă hŏk ƀai. Phơ phŏ ưh đei vao gah minh ƀar ƀai hŏk, inh apinh đe thâi kô mă ưh kơ kăl gô 'năr đơ̆ng rŏng ôh. 'Nguaih kơ jơ hŏk pơhrăm, nhôn oei chă hŏk hơlen tơ̆ hơnih vei 'măn hla bơ-ar kơ hnam trưng dah mă ah kơsơ̆ lĕch tơ̆ cham teh sŏk iĕr. Noh jing jơ rơvơn hơ-iă hloh"

Atŭm hăm tơdrong chơt hơ-iă đơ̆ng đe hŏk tro 'noh jing tơdrong chơt sơđơ̆ng jơhngơ̆m kơ đe mĕ ƀă ah kon hơ-ioh đei hŏk pơhrăm păng oei xa kơtă tơ̆ hnam trưng.

Sơnăm hŏk ou, pơđĭ 2 'nu kon kơ ƀok Rơ Mah Ca, bơngai Jarai, tơ̆ pơlei Chư Kó, xah Ia Púch, adoi hŏk oei xa hơdoi. Klo hơkăn ƀok noh jang kŏng nhơ̆n kôih kơtăk kơsu, hơnơ̆ng lĕch đơ̆ng hnam ah pơgê hrôih, đang kơ noh hăt hot brŏk chơ kon năm hŏk tơ̆ hnam trưng. Lơ̆m pơyan jang mir ƀa dah mă lơ̆m dôm năr 'mi kial, trong vih vơ̆t trôk trăp, ưh kơ tom năm chơ, ƀok athei kon oei tơ̆ hnam pơdơh kơ hŏk.

Dang ei, ah đe kon đei hŏk oei xa hơdoi tơ̆ hnam trưng đơ̆ng pơtơm giĕng truh hơtuch giĕng hloi. Klo hơkăn ƀok Rơ Mah Ca ưh đei hrat lơ̆m tơdrong chă sơng chơ kon brŏk vih, oei đe kon adoi da ƀiơ̆ kơ pơdơh hŏk kơyuơ kơ dôm tơdrong tơnap tap lơ̆m unh hnam păng trong nơnăm: “Bơnê kơ Đảng păng Teh đak hlôi man ăn hnam trưng hŏk oei hơdoi kơjăp 'lơ̆ng. Đơ̆ng dang ei, đe kon inh đei hŏk pơhrăm, oei xa, pơdơh pơdei, pơchơt lơ̆m hnam trưng, truh hơtuch giĕng pơtơm vih tơ̆ hnam. Inh sô̆ lơ̆m đon bơnôh dêh”

Hnam trưng hŏk oei xa hơdoi dôm jăl hŏk Ia Púch sơnăm hŏk ou đei 752 hŏk tro, đei asong jing 23 lăm hŏk. Vă mĕ ƀă hŏk tro băt hơdah păng drơ̆ng lăp hăm rim hnam trưng jăl kơđeh 'noh đơ̆ng hơtuch sơnăm hŏk 2025-2026, xah Ia Púch jang atŭm hăm rim hnam trưng jăl kơđeh, jăl THCS lơ̆m tơring chih akŏm tơdrong pơjing hnam trưng hŏk oei hơdoi dôm jăl hŏk. Lơ̆m dôm khei pơdơh he, tơdrogn chă bơngai hŏk, asong bơngai pơtho, pơkăp lăm hŏk, hơnih oei xa păng dôm tơdrong jang pơtho hŏk pơhrăm đei akŏm tơ̆ hnam trưng hloi.

Ƀok thâi Trương Duy Hồng, pơtho tơ̆ hnam trưng ăn tơbăt, tơdrong iŏk yua hnam trưng hŏk oei hơdoi adoi 'noh bơngai pơtho athei tơplih trong pơgơ̆r pơtho păng vei lăng hŏk tro. Thâi kô chu nhĭm hlôi pơjing grŭp Zalo, hŏk hôp păng pơma dơnuh kơtă hăm rim unh hnam vă mĕ ƀă băt hơdah tơdrong hŏk pơhrăm, oei xa kơ kon hơ-ioh: “Đe thâi kô chủ nhiệm hlôi hŏk hôp hăm mĕ ƀă hŏk tro, nhăn tin ăn mĕ ƀă tơroi gah tơdrong hŏk oei hơdoi. Lơ mĕ ƀă hŏk tro sơđơ̆ng jơhngơ̆m đon. Kơlih đe sư băt hơdah trong jang kơ hnam trưng 'nao tôch tih, tôm tơdrong, hơnih pơchơt, oei xa pơdơh pơdei sơđơ̆ng dêh”.

Atŭm hăm hnam trưng hŏk oei hơdoi Jăl kơđeh păng THCS Ia Púch, sơnăm hŏk 2026-2027, tơring gah Pơmơ̆t dêh char Gia Lai oei đei 6 hnam trưng le lăi băl atŭm pơtơm iŏk yua, sơng hŏk tro tơ̆ dôm xah sơlam teh. Dôm tơdrong ming man đei pơtơm đơ̆ng khei 11/2025, truh dang ei hlôi keh đang dôm tơdrong kăl ăn pơtho hŏk pơhrăm, hơnih oei xa. Tôm 7 hnam trưng hlôi iŏk đei hloh 6.800 hŏk tro, mă lơ noh hŏk oei hơdoi hloi.

'Nou jĭ tơdrong tơplih kăp gĭt hăm tơring sơlam gah Pơmơ̆t Gia Lai, hơnih đei pơhlom 90 km trong sơlam teh, lơ kon pơlei kon kông hơrih xa păng tơdrong vih vơ̆t, hŏk pơhrăm kơ kon hơ-ioh oei ƀơm lơ tơnap tap. Hăm tơdrong 'nao, hŏk tro ưh hơdrô̆ đei lăm hŏk, hơnih oei xa mă đei hloi hơnih vă đŏk hla bar hŏk, hơnih tơplŏng kơdou păng akŏm dôm tơdrong hŏk 'nguaih kơ jơ pơkăp. Kăp gĭt hloh noh, tơdrong hŏk kơ đe oh đei vei sơđơ̆ng, pơtăl kơ gơnơm lơ lơ̆m tơdrong sơng drơ̆ng păng tơdrong oei xa kơdih tơ̆ unh hnam.

Ƀok Phạm Văn Nam, Kơdră Hơnih Pơtho Pơhrăm dêh char Gia Lai ăn tơbăt, rim hnam trưng hŏk oei hơdoi dôm jăl hŏk gô tơgop pơm hơtŏ ƀiơ̆ tơdrong pơtho pơhrăm kơ tơring sơlam hăm dôm tơring ƀônh hiôk hloh, atŭm hăm noh pơhrăm đei bơngai jang kơtă ăn kơ tơring: “Hnam trưng hŏk teh đak rong 'me dôm jăl hŏk tơ̆ xah sơlam teh noh kăp gĭt tơpă. Đe oh đei vei lăng, rong 'me 'lơ̆ng, hŏk pơhrăm hiôk hian hloh, tơgop pơm tơplih đon tơchĕng. Đơ̆ng dôm hnam trưng ou gô pơjing đei bơngai jang hơgei vă đe oh chôt vih pơm jang ăn pơlei pơla kơdih po, tơgop hơtŏk mŭk drăm – tơpôl ăn kơ tơring"

Đơ̆ng sơnăm hŏk 'nao ou, hŏk tro tơ̆ tơring sơlam gah Pơmơ̆t dêh char Gia Lai pơtơm đei hŏk pơhrăm, oei xa lơ̆m hơnih hŏk oei xa 'lơ̆ng hloh. Hnam trung hŏk oei hơdoi teh đak rong 'me 'nao ưh hơdrô̆ tơplih tơdrong hŏk pơhrăm 'năr ou, mă oei jing hơnih tơgŭm, pơjing đei tơdrong hơrih ning nai kơnh ăn đe hơ-ioh tơ̆ tơring sơlam teh.