VOV4,Bahnar - Vă jê̆ 9.000 ‘nu tơ dăm pran jăng tơ̆ 5 dêh char Tây Nguyên năm pơm lĭnh, bơ̆ jang hơ năp jang vei lăng tĕh đak. Mă đơ̆ng pơ gơ̆r lơ̆m khei ‘năr jĭ covid-19 oei tôch hơ mơt, mă lei lêh pơ jao, iŏk linh sơ năm ‘nâu oei pơ gơ̆r sơ đơ̆ng ‘lơ̆ng, chơt hơ iă tôch tơ găl jĭ năr năm pơm linh đơ̆ng đe tơ dăm.

Bơ ngai tang măt ăn Anih tơm vei lăng Công an, Anih jang đảng dêh char Dak Lak kŭm hăm 1,2 anih jang kơ pal, khul grup truh pơ lung đe tơ dăm Dak Lak năm pơm linh

Lơ̆m ‘măng pơ jao linh sơ năm ‘nâu, lơ̆m dêh char Dak Lak đei 2.500 ‘nu tơ dăm năm pơm linh, 427 ‘nu tơ dăm năm pơm công an. Đe tơ dăm Dak Lak năm pơm linh ‘măng mă âu tơ tă đei đon jang chinh trĭ ‘lơ̆ng, tôm sơ năm, pran jăng, đei hŏk kơ jung ƀiơ̆ ngăl. Mă hơ dăh, hlŏh 70 ‘nu bơ ngai hŏk đăi hŏk - cao đẳng; 8 ‘nu bơ ngai đảng viên; tơ dăm bơ ngai kon kông đei hlŏh 1 puăt.

Lơ̆m năr năm pơm linh, linh hle Y Săm M’lô, tơ̆ phương Ea Tam, plt Buôn Ma Thuột, pơ ma: “Năm pơm linh ‘nŏh jĭ hơ năp jang tôch gĭt kăl đơ̆ng sơ năm mơ lôh. Yoa thoi nŏh inh pơm hla ar apinh mât pơm linh. Inh vă adrin hŏk pơ hrăm, pơ tâp, jang đang ‘lơ̆ng tơ drong jang đei pơ jao”.

Lơ̆m ‘măng pơ jao linh sơ năm 2022, dêh char Dak Lak đei 2.500 ‘nu tơ dăm năm pơm linh, 427 ‘nu tơ dăm nâwm pơm công an

Dêh char Lâm Đồng sơ năm ‘nâu đei 1.150 ‘nu tơ dăm năm pơm linh. ‘Nâu jĭ đe tơ dăm pran jăng grăng hơ kâu đei chă rơih đơ̆ng 12 apŭng, plt lơ̆m dêh char. Lêh pơ jao linh đei pơ gơ̆r tôch ‘lơ̆ng tơ̆ dôm tơ ring, sơ đơ̆ng ‘lơ̆ng păng gĭt kăl.

Sơ năm ‘nâu, dêh char Dak Nông đei hlŏh 1000 ‘nu bơ ngai năm pơm linh; lơ̆m nŏh đei vă jê̆ 900 ‘nu bơ ngai pơm linh, hlŏh 100 ‘nu năm pơm công an. Lơ̆m kơ sô̆ đe tơ dăm năm pơm linh kơ dêh char vă vei lăng tĕh đak ‘măng mă âu tơ tă đoan viên ngăl, đei 11 ‘nu bơ ngai hŏk đang đăi hŏk, cao đẳng; păng hlŏh 1 puăt ‘nŏh tơ dăm kon kông. 

Chơt hơ iă Năr năm pơm linh tơ̆ Dak Nông

2.656 ‘nu tơ dăm tơ̆ dêh char Gia Lai kŭm năm pơm linh vang vei lăng tĕh đak. Lơ̆m kơ sô̆ dôm bơ ngai tơ̆ Gia Lai năm pơm linh mă âu, bơ ngai hŏk cao đẳng, đăi hŏk hlŏh 1,4%, đei 22 ‘nu đảng viên; păng hlŏh 60% ‘nu bơ ngai kon kông.

Pơ ma adrol kơ năm pơm linh, linh hle Nguyễn Bá Kiên, phương Thắng Lợi, plt Pleiku ăn tơ băt: “Oh tôch hơ iă păng hưch hanh mưh đei ‘moi kiơ̆ jâng đe ‘nhŏng, đe ƀă adrol sơ̆ năm vei lăng tĕh đak. Oh tôch hơ iă mưh đei dơ̆ng lơ̆m khul linh Ƀô đô̆i Ƀok Hô vă chĕp vei tơ drong juăt jang kăch mang đơ̆ng unh hnam păng hơ drĕch hơ drung, pơm ăn ŏh đei đon lui, hưch hanh lơ̆m jơ hngâm. Oh kŭm tôch tơ tăm mưh vă mât lơ̆m 1 anih đei tơ drong arih xa ‘nao, ŏh vă adrin hŏk, pơ tâp pơ hrăm, arih bơ̆ jang kiơ̆ tơ drong ‘nao vă pơm thoi yơ gơ̆h tơ găl hăm nơ̆r tơ tă, pơ tho tơ ƀôh đơ̆ng đe ƀok kơ dră lơ̆m plt păng dôm nơ̆r tơ tă đơ̆ng mĕ ƀă oh hai”.

Lêh pơ jang, iŏk linh đei pơ gơ̆r sơ đơ̆ng ‘lơ̆ng, lăp hăm tơ dỏng tang găn jĭ covid-19 tơ̆ Gia Lai

Tơ̆ dêh char Kon Tum, tơ drong pơ jao iŏk linh kŭm đei pơ gơ̆r tơ păt ‘lơ̆ng, hơ hrei lơ̆m pơ gê 16/2. Sơ năm ‘nâu dêh char 800 ‘nu bơ ngai năm pơm linh, lơ̆m nŏh đei 8 ‘nu bơ ngai jang kơ tĕh đak; 1 ‘nu đảng viên. Linh hle Phạm Hoàng Quốc, tơ̆ phương Quyết Thắng, plt Kon Tum, đĭ đei kăn păng 1 ‘nu kon bơih, kơ dih kâu oei jang lơ̆m 1 Công ty Luơ̆t tơ̆ plt Hồ Chí Minh, năm pơm linh ‘măng mă âu ăn tơ băt: “Năr ‘nâu lơ̆m năr năm pơm linh inh tôch hơ iă, kŭm nhen dôm bơ ngai nai hăm hơ năp jang đơ̆ng 1 ‘nu kon pơ lei, inh tôch hơ iă hăm tơ drong ‘nŏh. Anih mă inh truh bơ̆ jang hơ năp jang đơ̆ng kon pơ lei ‘nŏh jĭ Trung đoàn 990 păng inh vă adrin jang đang ‘lơ̆ng tơ drong jang. Mă đơ̆ng mơ mat tat thoi yơ inh vă adrin đĭ jơ hngâm”.

Năr năm pơm linh tơ̆ pơ lei tơm Kon Tum

Bơ̆ jang tơ drong tang găn jĭ Covid-19, đĭ đăng bơ ngai năm pơm linh đơ̆ng 5 dêh char Tây Nguyên đei ƀet vắc xin jrŭm mă 2 păng jrŭm mă 3 bơih; adrol kơ năr năm pơm linh đei set hơ len SARS-CoV-2 vă đĭ đăng sơ đơ̆ng ‘lơ̆ng ngăl mưh năm mât tơ̆ anih khul linh, ưh đei bơ ngai jĭ Covid-19. Dôm tơ ring đei kon hơ ‘lơ̆p năm pơm linh bơ̆ jang ‘lơ̆ng tơ drong krao hơ vơn tơ gop ăn năr pơ jao iŏk linh sơ năm ‘nâu jing năr chơt hơ iă mưh năm pơm linh, pơ jing jơ hngâm đon chơt hơ iă ‘nă hal ăn đe tơ dăm năm pơm linh vei lăng tĕh đak.

Dơ̆ng: Tơ blơ̆