Tơ̆ thôn Mê Ka, xah Đam Rông 4, unh hnam 'nhŏng Liêng Hót Ha Ngát hlôi hơmet tôm hla bar hŏk, hơbăn ao hrŭk, 'long chih ăn 2 'nu kon, minh 'nu hŏk lăm 11, minh 'nu hŏk lăm 4. Hơrih tơ̆ tơring tơnap tap, tơdrong hơrih oei lơ kơƀah kơƀôch, mă lei hăm 'nhŏng Ngát, asong ăn tơdrong hŏk pơhrăm kơ kon hơ-ioh jing tơdrong asong jang ưh gơh kơƀah. 'Nhŏng akhan, lơ̆m minh tơpôl roi năr roi hơtŏk tơ-iung, tơdrong hŏk hlôh vao jing trong kơjăp ăn đe sơnăm mơlôh gơh băt hơdah, đei trong hiôk vă hơtŏk dơh po păng ưh đei ƀơm prơih lê̆ tơ̆ rŏng: “Hŏk pơhrăm 'noh kăp gĭt hloh vă ning nai kơnh hiôk ăn kon hơ-ioh hơtŏk tơ-iung kơdih. Ưh gơh lê̆ đe mon kơdŭn tơ̆ rŏng. Kơlih ning mônh kơnh, kơmăi kơmŏk 'nao gơh hơgei kơ teh đak kăl lơ tơdrong hlôh vao, kăl lơ tơdrong gơh phara băl. Mă tơnap tap mă lei athei hơdrin ăn đe kon năm hŏk”.

Tơdrong chơt hơ-iă 'noh tơdrong tơchĕng ou roi năr roi ƀôh hơdah lơ̆m rim pơlei pơla kon kông tơ̆ Lâm Đồng. Rim pơyan pơtơm năm hŏk, rim unh hnam kơchăng chă jên răt hla bar hŏk, hơbăn ao, tơmam drăm hŏk pơhrăm; dôm unh hnam oei tơnap tap adoi hơdrin chơ chă, phŏ chă tŏk iŏk vă kon hơ-ioh gơh đei tôm vă hŏk pơhrăm tơ̆ lăm. Ưh hơdrô̆ kơchăng ăn dôm tơdrong kăl tơ̆ hơnăp, lơ unh hnam oei pơtho ăn hơ-ioh băt gah hŏk pơhrăm, tơdrong jang păng vei răk tơƀăk mong gah joh ayŏ kơdih po. Đe sư băt hơdah, hŏk vă gơh hlôh vao, đei tơdrong jang, mă lei adoi jing trong vă đe sơnăm mơlôh kơjăp yak lĕch đơ̆ng pơlei pơla. 'Nhŏng Liêng Hót The, bơngai K’Ho tơ̆ Kueng kơphô̆ Bắc Tà Nung, phương Cam Ly - Đà Lạt tơroi:  “Gah unh hnam noh hơmet tôm tơroi ăn kơ kon băt hơdah tơdrong juăt jue 'noh tơm. Đơ̆ng noh ah kon hơ-ioh tih vơ̆, đe kon năm hŏk, akŏm lơ̆m hnam trưng gô tơroi tơbăt ăn đe bôl buăl lơ̆m hnam trưng. Đơ̆ng rŏng kơnh đe kon pơm jang lơ̆m anih jang kơ teh đak adoi băt hơdah gah khôi juăt so kon pơlei po kơdih”.

Mưh tơdrong kơchăng đơ̆ng mĕ ƀă hŏk tro akŏm đei đơ̆ng unh hnam, noh tơ̆ hnam trưng hŏk, tơdrong hơmet ăn sơnăm hŏk 'nao adoi đei pơtơm đơ̆ng hrôih. Tơ̆ xah tơnap tap Đam Rông 4, sơnăm hŏk ou đei hloh 4.300 hŏk tro đơ̆ng jăl hŏk mâm non truh Trung hŏk kơ sơ, mă lơ noh kon hơ-ioh bơngai kon kông. Rim hnam trưng đei ming man rơgoh 'lơ̆ng kơjăp; lăm hŏk cham pơsuh păng dôm tơmam drăm pơtho pơhrăm đei hơmet tôm. Duch pơtho Phạm Thị Ngọc Bích, Kơdră hnam trưng Mâm non Đạ Tông, xah Đam Rông 4 ăn tơbăt: “Tơ̆ lăm hŏk, bơngai pơtho hlôi pơjing đei hơnih hŏk 'lơ̆ng rơgoh. Truh tơ̆ lăm noh hŏk tro đei akŏm pơhrăm dôm tơdrong 'lơ̆ng trŏ hăm sơnăm hŏk kơ đe hŏk tro. Hnam trưng Mâm non Đạ Tông kŭm hơnơ̆ng pơgơ̆r dôm tơdrong akŏm pơma dơnuh hăm mĕ ƀă hŏk tro, bơngai pơtho păng hŏk tro, kiơ̆ đơ̆ng noh mĕ ƀă hŏk tro sơđơ̆ng jơhngơ̆m hăm kon hơ-ioh năm hŏk tơ̆ hnam trưng”.

Lâm Đồng dang ei đei 100 xah tơring kon kông păng groi kông; lơ̆m noh đei 27 xah tơnap tap, 5 xah sơlam teh păng tơring kăp gĭt Phú Quý. Jơ̆p dêh char đei hloh 182.000 hŏk tro kon kông. Tơ̆ dôm tơring oei lơ tơnap tap, tơdrong hŏk pơhrăm pơih trong gơh akŏm hlôh vao, jing minh lơ̆m dôm trong kăp gĭt tơgŭm ăn kon pơlei tơplih tơdrong hơrih.

Ƀok Ntơr Ha Krong, tơ̆ thôn Đạ Nhinh, xah Đam Rông 4, đei 3 'nu kon hŏk đang đăi hŏk. Đơ̆ng tơdrong đei ƀôh kơ unh hnam kơdih po, ƀok roi lui ngeh, đei tơdrong hŏk hlôh vao noh kon pơlei pơtơm gơh đei tơdrong hơrih sơđơ̆ng, đơ̆ng pơm jang truh tơdrong kiơ̆ dôm tơdrong hơgei 'nao:  “Sơ̆ ki hŏk pơhrăm ưh đei kơjung, mă lei dang ei mưh ưh kơ băt chư noh ưh gơh pơm kiơ ôh. Mă ba ưh đei jang 'lŏ, jang tih kiơ, mă lei ba kŭm băt trong chă vei lăng 'long pơtăm dah mă băt hơdah phŏng rei dah mă pơgang hơdrông đe chih hăm chư thoi yơ. Dang ei mưh kĕ đei jên 'noh hŏk đĭ đại học hloi. Đơ̆ng đei chư 'noh pơtơm kĕ atŏk tơ-iung lơ̆m rim tơdrong chă arih jang xa”.

Jơva hơgơ̆r pơtơm sơnăm hŏk 'nao hlôi re ang lơ̆m jơ̆p thôn pơlei tơ̆ dêh char Lâm Đồng, 'nhăk ba tơdrogn chơt hơ-iă lơ̆m khei pơtơm sơnăm hŏk 'nao. Tơdrogn chơt hơ-iă noh đei đơ̆ng tơdrong tơgŭm đơ̆ng jơnŭm pơgơ̆r tơring ăn tơdrong jang pơtho pơhrăm, tơdrong dăp đon dăp bơnôh đơ̆ng rim bơngai pơtho, truh hloi tơdrong kơchăng đơ̆ng rim unh hnam kon pơlei kon kông. 'Nou jĭ tơdrong kăp gĭt vă đe hŏk tro tơ̆ tơring kon pơlei kon kông kơ dêh char Lâm Đồng lui ngeh năm truh tơ̆ lăm hŏk, tih vơ̆ djơ̆ 'lơ̆ng pơtoi pơjing tơdrong hơrih sơđơ̆ng 'lơ̆ng kơtă tơ̆ pơlei pơla po kơdih.