VOV4.Bahnar - Dôm năr âu, tơ̆ Anih vei lăng tơ gŭm tơ pôl dêh char Gia Lai, rim kơ dră chĕp kơ̆l, khŭl tơ pôl kŭm hăm lơ bơ ngai đei jơ hngơ̆m đon ‘mêm mơ nat hlôi năm pơ lung, asong tơ mam, pơ gơ̆r trung thu vă đe mon mơ ti, đei tơ drong arih sa mơ mat tat sơng 1 pơ yan Trung thu tơ nŏ hiôk. Dang ei Anih vei lăng tơ gŭm tơ pôl dêh char Gia Lai tŏk bŏk rong ‘me 140 ‘nu, lơ̆m noh đei 54 ‘nu hơ ioh mơ ti, đei hŭt hơ chăng dăh mă ưh kơ đei bơ ngai vei rong.

Lơ tơ mam hlôi pơ jao truh ăn kơ đe hơ ioh tơ̆ Anih vei lăng tơ gŭm tơ pôl dêh char Gia Lai ƀlep ƀơ̆t năr Trung thu

Dôm năr âu ki lơ bơ ngai đei jơ hngơ̆m đon ‘mêm mơ nat hlôi tơ gŭm jên păng tơ mam nhen ƀĕng keo, tơ mam pơ ngôi... vă kơ đe mon gơh sơng 1 pơ yan Trung thu tơ nŏ hiôk nhen đe bôl buăl sơ năm bơ hnơr. Yă Tạ Thị Anh Đào, Kơ dră vei lăng Anih jang tơ băt: Dôm anih jang, dôm khŭl tơ pôl tă kơ đei tơ drong bơ ngơ̆t truh, lơ anih jang năm asong tơ mam ăn kơ đe mon, pơ lung đe mon. Truh dang ei hlôi đei 8 khŭl năm asong tơ mam pơ lung vă kơ đe mon ƀôh dă ƀiơ̆ kơ pơ sĕl mă ƀôh tơ pôl ling lang bơ ngơ̆t truh păng đe mon ling lang đei dôm bơ ngai tơ gŭm ăn.

Thuem: Tơ blơ̆