Tơ̆ dêh char Kon Tum, 2 năr, ‘năr 24 , 25/12, lơ lap kon pơlei kiơ̆ lui chơt hơiă vang năm hơkŭm krao khan tih tơ̆ dôm hnam hơkŭm sơng Nôel hơpơi ‘meh ăn sơnăm ‘nao 2023 sơđơ̆ng ‘lơ̆ng, hiôk hian. Vă tơdrong chơt hơiă gơmang Nôel pơgơ̆r sơ đơ̆ng ‘lơ̆ng, dôm hnam hơkŭm tơ̆ Kon Tum tă kơjang hơdai hăm khŭl kơdră tơring lơ̆m tơdrong vei lăng sơđơ̆ng tơpôl.

Tơ̆ dôm hnam hơkŭm tơ̆ pơlei tơm Kon Tum, nhen: Hnam hơkŭm tơ̆r, Hnam hơkŭm kŏng yăo Tân Hương, Hnam hơkŭm kŏng yăo Phương Nghĩa… hơnih akŏm lơ kon pơlei kiơ̆ lui păng tơmoi oei hơmet ăn trong jang vei lăng sơđơ̆ng trong nơnăm jum dăr hơnih hnam hơkŭm. Pơma dơnuh hăm kơdră chĕp kơ̆l, dôm khŭl tơpôl năm ngôi, hmach chơt hơiă Nôel, Ƀok soi tơm vei lăng Hnam hơkŭm Kon Tum Nguyễn Hùng Vị tơroi jơhngơ̆m đom vang yak hơdai hăm hơdrĕch hơdrŭng, hơdai hăm teh đak đơ̆ng Hnam hơkŭm Kon Tum păng kon pơlei kiơ̆ lui.

Tơ̆ Gia Lai, lơ̆m gơmăng 24-12 păng ‘năr 25-12, kon pơlei kiơ̆ lui Kŏng yăo păng Tin lành tơ̆ dêh char Gia Lai chơt hơiă pơgơ̆r Noel 2022. Tơ̆ plt Pleiku, tơdrong sơng Noel tơ̆ dôm Hnam hơkŭm tôch hơiă. Tơ̆ dôm hnam hơkŭm Thăng Thiên (phường Tây Sơn), Hnam hơkŭm Thánh Tâm (phường Phù Đổng), Hnam hơkŭm Mĕ Mari (phường Hoa Lư), Hnam hơkŭm Đức An (phường Ia Kring)... kon pơlei kiơ̆ khop vang ngôi pơchơt năr noel.

Đơ̆ng rŏng dôm sơnăm ƀơm ưh ‘lơ̆ng đơ̆ng jĭ hơbuh, sơnăm ‘nâu, jơhngâm đon phơi rơhơi hiôk mưh sơng Noel roi tŏk dơ̆ng hăm đĭ đăng kon pơlei kiơ̆ lui khop, kŭm nhen kon pơlei nai, mă loi hăm jơhnơr mơlôh. Kơsô̆ druh dăm păng kon pơlei chă ngôi, năm hơkŭm tŏk lơ hlŏh kơ dôm sơnăm adrol sơ̆ ‘năi. Khul jang kơpal jơ̆p tơring hơtŏk tơdrong vei sơđơ̆ng tơ̆ trong gre, vei sơđơ̆ng lơ̆m tơpôl tơ̆ tơring. Ƀlep ƀât ‘măng mă âu, anih jang đảng păng khul kơdră pơgơ̆r, MTTQ păng rim khul grŭp lơ̆m dêh char ‘măn đon tơrĕk, năm ngôi, đei nơ̆r pơlung tôch tơtom hăm rim Hnam hơkŭm lui Kŏng yăo păng khul lui Tin lành.