VOV4.Bahnar - Tơ drong jang pơm trong Trường Sơn Đông năm klĕch 7 dêh char tơ ring Tŏk bŏk păng Tây Nguyên, oei vă pơm klĕch Pơ gar ‘long tĕh đak Chư Yang Sin dêh char Dak Lak păng pơ gar ‘long tĕh đak Bidoup Núi Bà, dêh char Lâm Đồng. Jĭ tơ drong jang gĭt kăl kơ tĕh đak, năm klĕch tơ ring bri ‘long tôch kăp gĭt, đei vei lăng tôch kơ jăp, mă trŏ tơ drong jang ‘nâu athei bơ̆ jang mă ‘lơ ‘lơ̆ng, kiơ̆ dôm tơ drong hơ găt đơ̆ng luơ̆t. Mă lei mưh bơ̆ jang tơ pă tơ̆ yăn âu ‘nŏh ưh đei pơm kiơ̆ dôm tơ drong hơ găt. Anih jang phă bri kâm, chưk tĕh vă pơm trong mă tơ ‘ngla bri păng khul kơ dră tơ ring ưh đei băt yă kiơ. 

Tơ̆ tơ ƀôt bri 1383 păng 1402 (Pơ gar ‘long tĕh đak Chư Yang Sin – dêh char Dak Lak) – tơ ring mă Anih vei lăng tơ drong jang 46, Anih tơm jang tơ gŭm, Anih tơm vei lăng khul linh tĕh đak tơ lĕch tơ drong jang pơm trong Trường Sơn Đông tơ drong jang Đ41. Tơ̆ âu, 1 pôm trong kơ jung hlŏh 7km, năm klĕch 2 tơ ƀôt bri hlôi đei chưk hơ met tĕh, hăm hlŏh 15ha bri ‘long hiong răm. Đĭ đăng ‘long bri tơ̆ trong đei chưk âu đei sir kôch, tŏh iŏk, ƀŭ hơ met pă ƀôh yă kiơ; lăp oei ƀôh 1 kơ sô̆ tơm ming rơ gôn rơ gan tơ ter trong đĕch. Ƀok Y Te Buôn Krông, Kơ dră Anih vei lăng bri ‘long apŭng Lắk, dêh char Dak Lak ăn tơ băt, ưh băt đe kŏh ‘long, chưk tĕh đơ̆ng lai yơ. Dôm anih jang kơ pal kơ apŭng păng dêh char lăp băt tơ drong ‘nâu ƀât hơ tuch khei 1 âu ki đĕch.

Oei ƀok Lộc Xuân Nghĩa, Kơ dră vei lăng Pơ gar ‘long tĕh đak Chư Yang Sin ‘nŏh tơ blang: pơ gar đei đe chưk tĕh ƀlep ƀât dôm anih gak akŏm bơ ngai gak vei lăng bri jê̆ tơ ring kon pơ lei oei. Atŭm hăm ‘nŏh anih jang kŭm ưh kơ chăng, ưh ê 1 anih jang kơ tĕh đak tơ tă phă bri ƀât tam mă đei nơ̆r asong: “’Nhŏng ŏh tơ̆ anih gak đei đon ưh kơ chăng, hơ nơ̆ng tơ chĕng ‘nŏh jĭ anih jang kơ tĕh đak, kơ na lăp akŏm bơ ngai jang tơ jê̆ âu tơ ring hơ mơt đei đe muih rŏh sŏh bri pơm mir. Găh tơ drong vei lăng đơ̆ng kơ dră chĕp kơ̆l, dôm khul jang kơ pal kơ Pơ gar ‘long ‘nŏh jĭ dăr lăng, năm gak tôch mơ mat tat, tơ̆ dôm tơ ring hlom lơ̆m bri kŭm tam gơ̆h năm truh.”

Trong 7km đei chưk klĕch Pơ gar ‘long tĕh đak Chư Yang Sin.

Ƀok Võ Thành Huệ, Phŏ Kơ dră vei lăng kon pơ lei apŭng Lắk (dêh char Dak Lak) pơ ma hơ dăh, anih pơm trong Trường Sơn Đông ưh đei apinh dăh mă tơ roi ăn khul kơ dră tơ ring mă kư̆ ăn kơ măy kơ mŏk năm chưk bri kơ drơ̆ng lơ̆m Pơ gar ‘long Chư Yang Sin. Ƀok Huệ ăn tơ băt, 15ha bri ‘nao chưk đei chă ƀôh âu tam đei hla ar tơ chơ̆t asong tơ plih ming tơ drong yoa tĕh, kơ lih yoa tơ drong ‘nâu găh hơ năp jang kơ Thủ tướng tĕh đak. Apŭng năng ‘nâu jĭ tơ drong pơm glăi luơ̆t păng oei jang hơ doi hăm dôm anih jang kơ pal kơ dêh char vă dăr hơ len, pơm hơ dăh: “Dôm anih jang ưh đei tơ roi kiơ ăn khul kơ dră tơ ring, tam đei hla ar tơ plih ming tĕh bri đĭ ăn kơ măy kơ mŏk năm jang hloi bơih thoi nŏh sư pơm glăi hăm dôm tơ drong hơ găt đơ̆ng tĕh đak. Apŭng pơ jao ăn Anih vei lăng bri dăr hơ len, bơ̆ jang hăm tơ ‘ngla bri ‘nŏh jĭ Chư Yang Sin, chih tơ roi ăn Anih vei lăng choh jang xa păng atŏk tơ iung tơ ring tơ rang, Anih vei lăng bri dêh char vă đei nơ̆r pơ tho sek tơ lang.”

Ƀok Nguyễn Quốc Hưng, Kơ dră Anih vei lăng bri ‘long dêh char Dak Lak ăn tơ băt, tơ ƀôt mă anih pơm trong phă bri găh tơ drong jang Đ41 lơ̆m tơ drong jang pơm trong Trường Sơn Đông, yoa Anih vei lăng tơ drong jang 46 (Anih tơm jang tơ gŭm ăn khul linh, Anih tơm vei lăng khul linh tĕh đak) pơm tơ ‘ngla tơ mât jên jang. ‘Nâu jĭ 1 lơ̆m lơ tơ drong jang pơm trong Trường Sơn Đông, pơ hlom năng kơ jung dang 36km hăm dôm jĭt ha bri kơ drơ̆ng lơ̆m Pơ gar ‘long tĕh đak Chư Yang Sin kăl đei tơ plih ming.

‘Long bri đei kŏh phă vă chưk tĕh pơm trong lơ̆m pơ gar ‘long tĕh đak Chư Yang Sin

Ƀok Hưng pơ ma hơ dăh, dêh char Dak Lak păng Anih tơm vei lăng choh jang xa păng atŏk tơ iung tơ ring tơ rang hlôi pơ tho tôch rơ đăh ăn Anih vei lăng tơ drong jang 46 pơm hla ar vă tơ plih bri. Mă lei, ƀât tam mă pơm đang hla ar, tam đei kĭ asong tơ plih ming bri ‘nŏh anih jang đĭ ăn gre chưk bri bơih. Anih vei bri oei jang hơ doi hăm dôm anih jang kơ pal dăr hơ len, pơm hơ dăh tơ drong phă bri glăi luơ̆t âu: “Anih vă jang hơ doi hơ len năng rim tơ drong tơ̆ anih chưk phă bri vă sek tơ lang kiơ̆ tơ drong hơ găt, kiơ̆ luơ̆t vei lăng bri, kiơ̆ dôm tơ drong tơ chơ̆t. Tơ drong ‘nâu ưh pă đei phak jên đĕch bơih, hlŏh 5 sao bri ‘long đĭ sek phak kron kiơ̆ luơ̆t bơih pơ ma kiơ ‘nâu ‘nŏh hlŏh 15ha bri kơ drơ̆ng.”

Pơ ma nuh hăm bơ ngai chih tơ drong kơ tơ̆ng ang ăn Radio nơ̆r pơ ma VN, 1 ‘nu kơ dră chĕp kơ̆l Anih vei lăng tơ drong jang 46 ăn tơ băt, ‘nao iŏk jang tơ drong jang tơ̆ âu dôm khei đĕch, dang ei oei hơ len năng dơ̆ng rim tơ drong vă tơ roi ăn Anih tơm vei lăng khul linh tĕh đak. Anih vă chih tơ roi, tơl tơ blang ăn khul chih hla ar tơ roi mưh iŏk đei nơ̆r đơ̆ng Anih tơm.

Ưh lăp chưk pơ gar ‘long tĕh đak Chư Yang Sin vă pơm trong Trường Sơn Đông đĕch, tơ drong kŏh phă bri pơm trong kŭm đei ƀôh tơ̆ pơ gar ‘long tĕh đak BiDoup Núi Bà (dêh char Lâm Đồng). Tơ̆ tơ drong jang Đ42 păng C13 lơ̆m tơ drong jang, 1 jăl trong kơ jung 2,3 km hăm lơ bri ‘long kơ drơ̆ng đei kŏh phă pơ gŏh. 

Kiơ̆ tơ drong hơ găt, bri kơ drơ̆ng ‘nŏh jĭ tơ mam tĕh đak đei vei lăng tôch kơ jăp; tơ drong tơ plih ming athei đei Kuô̆k hô̆i, Khul kơ dră tĕh đak drơ̆ng nơ̆r asong ‘mơ̆i. Tơ drong anih pơm trong Trường Sơn Đông chưk phă bri kơ dih ưh lăp glăi hăm dôm tơ drong hơ găt đĕch mă oei pơ jing trôm pơ lôh tih ăn tơ drong kŏh phă bri păng tơ gar iŏk ‘long tơ̆ dôm Pơ gar ‘long tĕh đak Chư Yang Sin păng Bi Doup Núi Bà.

Dơ̆ng: Tơ blơ̆