VOV4.Bahnar - Pơ gê 18/1, tơ̆ Hà Nội, Cổng Thông tin điên tư Khul kơ dră tĕh đak, Ƀăo Điên tư Khul kơ dră tĕh đak pơm gơ̆r roi tơ băt tơ plih ming rup dơ̆ng tang ‘nao, pơ gơ̆r vei lăng tơ drong bơ̆ jang atŭm. Phó Thủ tướng Vũ Đức Đam truh akŏm păng iung pơ ma lơ̆m jơ pơm lêh.

16 sơ năm âu ki iŏk đơ̆ng ‘năr 10/1/2006, ƀât mă Thủ tướng Phan Văn Khải kơ tĭt ‘long tĭt hơ tŏk iŏk yoa internet jơ̆p plei tĕh Cổng TTĐT Khul kơ dră tĕh đak (blŭng a ‘nŏh jĭ Website Khul kơ dră tĕh đak), jing kênh tơ roi tơ băt hơ nơ̆ng, pơ truh, sơng iŏk dôm tơ drong tơ roi kăl, kơ sô̆ chih jô̆ trŏ ƀlep đơ̆ng Khul kơ dră tĕh đak tơ̆ mang Internet; pơ vih ‘lơ̆ng ăn tơ drong pơ gơ̆r bơ̆ jang đơ̆ng Khul kơ dră tĕh đak, Thủ tướng tĕh đak.

Rim sơ năm, Cổng TTĐT Khul kơ dră tĕh đak hơ tŏk jô̆ păh lăp hlŏh 30.000 tơ drong kơ tơ̆ng ang, ƀai chih, album rup, video clip, hlŏh 400 blăh hla ar chih tơ roi ăn tơ pôl, tơ mât hlŏh 2.000 hla ar chih hơ găt luơ̆t păng dôm hla ar chih nơ̆r pơ tho đơ̆ng Khul kơ dră tĕh đak, Thủ tướng tĕh đak, chih tơ lĕch dang 1.200 kơ sô̆ ƀai chih tơ roi…

Dơ̆ng: Tơ blơ̆