VOV4.Bahnar - Đơ̆ng rŏng khei ‘năr pơ dơh đunh yua kơ ƀơm kơ nê̆ đơ̆ng ji hơ buh Covid-19, tơ drong jang tơ mang lăng kơ Đà Lạt – Lâm Đồng hlôi mơ sưt mơ sat hơ lơ̆k dơ̆ng păng sơng đei roi ‘năr roi lơ tơ moi.  Mă đơ̆ng thoi noh ră, lơ tơ drong ưh kơ ‘lơ̆ng hlôi đei ƀôh, mă loi ‘noh jĭ tơ drong bơ ngai chă pơm kơ dranh bơ̆ jang bơ̆ jang tơ gar băl, pơm ưh kơ sơ đơ̆ng. Vă pơ vih pơ văn ‘lơ̆ng ‘meh vă chă năm lăng, pơ dơh ngôi, dôm anih jang kơ pal tơ ring tŏk bŏk hơ drin hơ met ming dôm tơ drong ưh kơ ‘lơ̆ng, pơ jing um ai Đà Lạt iơ̆m dim, rơ hâu, ‘mêm kơ tơ moi.

Khei ‘năr âu ki, ƀơ̆t tơ mang lăng Đà Lạt chơt hơ iă hơ lơ̆k dơ̆ng đơ̆ng rŏng khei ‘năr pơ dơh yua kơ jĭ covid-19, pơ lei tơm rơ bâu pơ kao hlôi đei ƀôh lơ tơ drong ưh kơ ‘lơ̆ng. Ƀôh hơ dăh hloh ‘noh jĭ tơ drong “ bơ ngai kơ dranh chông trong” bơ̆ jang tơ gar băl jih trong, tĕch mơ dro ưh kơ tơ păt ‘lơ̆ng... Băt hơ dăh tơ mang lăng ‘noh jĭ tơ drong jang mŭk drăm tơm, khŭl kơ dră chĕp kơ̆l pơ lei tơm Đà Lạt hlôi hơ drin tơ plih ming ‘lơ̆ng cham char anih kơ drơ̆m, hơ tŏk loi dơ̆ng tơ drong jang vei lăng vă tơ tom hơ met ming dôm tơ drong oei đei. Thiếu tá Trương Quang Vũ, Khŭl Kanh sat dăr hơ len pơm glăi găh mŭk drăm, Kŏng an pơ lei tơm Đà Lạt tơ băt, dôm tơ drong “ bơ ngai pơm kơ dranh chông trong” tơ gar băl tơ moi đei ƀôh lơ̆m khei ‘năr âu ki hlôi đei anih jang mơ̆t jang păng hơ met ming kơ jăp.

          “Dôm anih jang kơ pal hơ nơ̆ng hơ len lăng, ăn dôm anih jang pơ kăp ‘noh ưh kơ hơ păh jên ăn kơ dôm bơ ngai jang pơ tho roi tơ ƀôh tơ mang lăng, yua kơ đơ̆ng noh pơm đei ƀôh tơ drong ưh kơ lăp băl đơ̆ng dôm bơ ngai pơm kơ dranh, bơ ngai jang pơ tho tơ ƀôh, pơm ăn ƀơm kơ nê̆, pơm ưh kơ sơ đơ̆ng”.

Đà Lạt jĭ hơ nih năm truh hơ iă đơ̆ng tơ moi tơ mang lăng

          Kiơ̆ kơ ƀok Nguyễn Viết Vân, Kơ dră Anih vei lăng găh joh ayŏ, tơ plŏng kơ dâu păng tơ mang lăng dêh char Lâm Đồng, kŭm hăm akŏm hơ tŏk tơ drong ‘lơ̆ng, hơ tŏk tơ iung dôm tơ mam tơ mang lăng kơ jăp ‘lơ̆ng, dêh char tŏk bŏk krao hơ vơn đĭ đăng kon pơ lei hơ tŏk ‘lơ̆ng đon băt jang tơ năp lơ̆m vei lăng cham char, hơ dai hăm tơ drong vei răk păng hơ tŏk tơ drong oei sa bơ ngai Đà Lạt “iơ̆m dim, rơ hâu, ‘mêm kơ tơ moi”.

        “Tơ̆ hơ năp kơnh nhôn hơ nơ̆ng jang ‘lơ̆ng tơ drong jang tơ roi tơ băt, hơ tŏk loi dơ̆ng tơ drong jang hơ len lăng tơ drong hơ tŏk kơ jă, chă dui tơ moi âu nai ‘noh gô sek phak tơ păt. Pơm liơ pơ jing um rup kơ kon bơ ngai Đà Lạt – Lâm Đồng ‘lơ̆ng ƀiơ̆, hơ gei, rơ hâu, iơ̆m dim, ‘mêm kơ tơ moi; vă tơ moi lơ̆m teh đak păng apŭng plĕnh teh mưh truh tơ̆ Đà Lạt, mưh truh tơ̆ Lâm Đồng gô hiôk hloh, vei dơ̆ng đei dôm um rup ‘lơ̆ng hloh”.

          8 khei blŭng sơ năm ‘nâu, Đà Lạt – Lâm Đồng hlôi sơng 5 triệu 70 rơ bâu ‘nu tơ moi truh tơ mang lăng, ƀĭch pơ dơh ngôi, tŏk 153% pơ têng hăm khei ‘nâu sơ năm hơ drol. Kiơ̆ kơ mŏ Đào Thị Huyền Trang, tơ moi truh đơ̆ng dêh char Bình Thuận, Đà Lạt hlôi tơ plih kŭm lơ, ưh kơ khan lăp tơ drong ‘lơ̆ng dôm kơ loăi pơ vih pơ văn đei hơ tŏk, tơ mam tơ mang lăng lơ hloh, mă dôm tơ drong găh bơ ngai chă dui hor tơ moi, pơ gơ̆ kơ jă, tĕch mơ dro tơ gar băl hlôi tơ jur hloi.  

“Ĭnh ƀôh ‘năr tôch rơ ngơp. Hơ nih tơ̆ âu đei lơ hơ nih ăn kơ ĭnh phĭn rup. Rim bơ ngai kŭm tôch kơ rơ hâu păng hơ iă”.

“Iơ̆m dim, rơ hâu, ‘mêm kơ tơ moi” đei băt hơ dăh ‘noh jĭ trong oei sa kơ bơ ngai Đà Lạt. Hăm trong oei sa ‘noh, bơ ngai Đà Lạt gô tơ goăt 1 jơ hngơ̆m đon vă găn đĭ tơ drong bơ ngai chă dui hor tơ moi vă sơng đei tơ moi năm tơ mang lăng hăm pơ lei tơm rơ bâu pơ kao.

                                                                                    Quang Sáng: Chih

Thuem: Tơ blơ̆