VOV4.Bahnar - ‘Năr 5/7, Dơ nŏ anih vei lăng kon pơ lei plt Đà Lạt (Lâm Đồng) ăn tơ băt, plt hlôi pơ jing Grŭp hơ len năng bri hăm kơ măy kơ mŏk ‘nao vă hơ tŏk tơ drong vei lăng bri, tang găn kŏh phă bri, tơ gar iŏk tĕh oei đei ƀôh lơ lơ̆m plt. Grŭp jang gĭt kăl âu đei 7 ‘nu bơ ngai, yoa Phŏ Kơ dră Anih vei lăng bri ‘long plt Đà Lạt chĕp kơ̆l, dôm bơ ngai jang oei đei ‘nŏh jĭ bơ ngai jang, kăn ƀô̆ ki thuơ̆t đơ̆ng dôm anih tơ ‘ngla bri păng khul vei lăng bri.

Đà Lạt tơ mât yoa kơ măy kơ mŏk ‘nao vă vei lăng bri

Tơ drong jang đơ̆ng grŭp âu ‘nŏh iŏk yoa kơ măy ‘nao nhen flycam, dôm kơ măy phĭn rup vê̆ tinh Google, um rup đơ̆ng rơ vơ̆ng plenh… vă dăr hơ len bri, pơ yoa ăn tơ drong vei lăng păng atŏk tơ iung bri, chă ƀôh hrôih dôm tơ drong pơm glăi, anih đei đe kŏh phă bri păng tơ gar iŏk tĕh bri. Tơ drong pơ jing Grŭp hơ len năng bri hăm kơ măy kơ mŏk ‘nao âu gô tơ gŭm hơ met pơ ‘lơ̆ng, tang găn păng sek tơ lang tơ tom dôm tơ drong glăi kŏh phă bri, tơ gar iŏk tĕh oei jing tơ drong tôch tơ tŏ tơ̆ tơ ring.

Dơ̆ng: Tơ blơ̆