VOV4.Bahnar - Pơ gê ‘năr (14-6), Jơ nŭm pơ gơ̆r kon pơ lei kơ pơ lei tơm Đà Nẵng pơ gơ̆r ‘măng hop akŏm tơ drong jang păng pơ gơ̆r tơ drong jang chă rơ̆ih bơ ngai jang găh gơ̆h jang đơ̆ng Jơ nŭm pơ gơ̆r kon pơ lei kơ pơ lei tơm. Tơ̆ ‘măng hop akŏm, Jơ nŭm pơ gơ̆r kon pơ lei kơ pơ lei tơm Đà Nẵng hlôi pơ drơ̆ng kiơ̆ Tơ drong tơ chơ̆t ăn pơ dơ̆h kơ jang pơm Phŏ Kơ dră Jơ nŭm pơ gơ̆r kon pơ lei kơ pơ lei tơm păng ưh kơ ăn pơm bơ ngai tang măt Jơ nŭm pơ gơ̆r kon pơ lei pơ lei tơm jăl X, jăl jang 2021-2026 hăm ƀok Lê Minh Trung.

Hơ drol ‘noh, tơ̆ ‘măng hop akŏm kơ Ban Bí thư yua đơ̆ng Tổng Bí thư Nguyễn Phú Trọng pơ gơ̆r, Ban Bí thư hlôi tơ chơ̆t pơm kiơ̆ ki luơ̆t hăm trong: kăt kơ chư̆k đĭ đăng dôm kơ chư̆k jang lơ̆m Đảng hăm ƀok Lê Minh Trung, bơ ngai jang lơ̆m Khŭl chĕp kơ̆l anih jang Đảng pơ lei tơm, Phŏ Bí thư Đảng đoàn, Phŏ Kơ dră Jơ nŭm pơ gơ̆r kon pơ lei kơ pơ lei tơm Đà Nẵng. Ƀok Trung hlôi ưh kơ đei pơ hrăm, vei kơ jăp jơ hngơ̆m đon ‘lơ̆ng; pơm glăi tơ drong hơ găt găh dôm tơ drong đảng viên ưh kơ gơ̆h pơm, tơ drong hơ găt găh hơ năp jang pơm jŭk yŭk trong hơ lâu, pơm glăi Khôi luơ̆t iŏk ŭnh om chom gŏ. Pơm glăi đơ̆ng ƀok Lê Minh Trung pơm ưh kơ ‘lơ̆ng lơ̆m tơ pôl, ƀơm kơ nê̆ truh bưng ai đơ̆ng khŭl jang đảng, anih jang teh đak păng đơ̆ng đảng viên.

Thuem: Tơ blơ̆