VOV4.Bahnar - Kơ sơ̆ 5/5, Dơ nŏ anih vei lăng kon pơ lei plt Đà Nẵng pơ gơ̆r hôp hơ len năng tơ drong jang hơ met ăn Hop akŏm atŏk tơ iung trong păr Châu Á 2022 lơ̆m khei 6 truh. ‘Nâu jĭ tơ drong tôch gĭt kăl hăm plt Đà Nẵng vă tơ iung dơ̆ng tơ drong chă tơ mang lăng, tơ gop pơih dơ̆ng trong păr ‘nao, hơ tŏk tơ drong tơ mât jên jang hăm dôm anih jang gre păr lơ̆m apŭng plenh tĕh.

Hop akŏm atŏk tơ iung trong păr châu Á 2022 đei 19 tơ drong jang tơm păng tơ drong jang iĕ. Kiơ̆ nơ̆r tơ roi đơ̆ng Anih vei lăng chă tơ mang lăng plt, jô̆ truh ‘năr 5/5, đei hlŏh 400 ‘nu bơ ngai tang măt truh đơ̆ng 155 anih jang kĭ măt vang năm hop akŏm.

Tơ̆ hop akŏm atŏk tơ iung trong păr Châu Á 2022 kŭm đei lơ tơ drong jang nai hai yoa dôm anih jang kơ pal, tơ ring tơ rang pơ gơ̆r nhen: Hop akŏm “Đà Nẵng: Anih truh ‘lơ̆ng kơ châu Á”; Sơng păng bơ̆ jang hăm dôm anih tơ mât jên jang găh gre păr – chă tơ mang lăng; Ming pơ dă tơ mam OCOP… Rim tơ drong jang hơ met tŏk bŏk đei Đà Nẵng bơ̆ jang tôch ai, vă hơ met đang adrol kơ ‘năr 25/5 truh.

Dơ̆ng: Tơ blơ̆