VOV4.Bahnar - Kơsơ̆ năr 17/1, pơlei tơm Đà Nẵng pơgơ̆r Hop akŏm tơlĕch jang Tơdrong jang hơdoi Tơmang pơ hiơ̆-Gre păr păng atŏk kơtang trong păr năm trŭh tơ̆ Đà Nẵng. Tơdrong jang pơtrŭh rim păh jang hơdoi tơmang pơ hiơ̆ păng bơ̆ jang gre păr trong vă jang plôih trong păr apŭng plĕnh tĕh lơ̆m sơnăm 2022 atŭmn hăm rim trong tơgŭm djru tơdrong jang gre păr hrei au. Dang ei, cham gre păr apŭng plĕnh tĕh Đà Nẵng đei trong jang tơjur đơ̆ng 10-50% kơ jă bơ̆ jang gre păr hăm Hơnĭh jang gre păr chơ tơmoi năm tơ̆ tĕh đak đe; ăn mơng đĕch hơnĭh bơ̆ jang ăn rim Hơnĭh jang gre păr chơ tơmoi. Jei lơ̆m kơsơ̆ năr 17/1, Dơnŏ anĭh vei lăng Tơmang pơ hiơ̆ pơlei tơm Đà Nẵng hăm Kŏng ty Mơdro sa Duy Anh kĭ pơkăp Hla bơar ƀlŏk hơdơ̆r jang hơdoi pơgơ̆r Hop akŏm Atŏk tơ iung trong păr Châu Á 2022. Hop akŏm atŏk tơ iung trong păr Châu Á 2022 gô pơgơ̆r đơ̆ng năr 6-8/6/2022, hơvơn hlŏh 500 ‘nu bơngai tang măt đơ̆ng 110 hơnĭh jang gre păr, 30 Hơnĭh jang ba đe tơmang pơ hiơ̆. ‘Nau đei lăng jing tơdrong hơmŏ kơtang hlŏh ăn pơgơ̆r dơ̆ng pơma dơnŭh dih băl jang gre păr apŭng plĕnh tĕh tơ̆ Đà Nẵng.

Tơblơ̆ nơ̆r: Amazưt