VOV4.Bahnar - Anih vei lăng bơ ngai jang teh đak đe ( Anih tơm vei lăng găh bơ ngai jang - linh jĭ rơ ka păng tơ pôl) tơ băt: đơ̆ng rŏng khei ‘năr pơ dơh yua đơ̆ng jĭ Covid-19 đei ƀôh, đơ̆ng ‘năr (15/02), Đài Loan (Trung Quốc) pơ̆ih ‘măng, sơng iŏk tôm bơ ngai jang teh đak đe đơ̆ng: Việt Nam, Indonesia, Thái Lan păng Philippin năm bơ̆ jang. ‘Nâu jĭ tơ drong hiôk ăn bơ ngai jang ‘meh năm bơ̆ jang tơ̆ Đài Loan (Trung Quốc), hăm jên khei dang 20 triệu hlak jên 1 khei. Hơ drol kơ mơ̆t tơ̆ Đài Loan (Trung Quốc) bơ̆ jang, bơ ngai jang athei ƀet tôm kơ liêu vaccine bơ̆ng jĭ Covid-19 păng hơ len lăng PCR 48 jơ hơ drol kơ năm tơ̆ teh đak sư. Đơ̆ng rŏng kơ năm mơ̆t tơ̆ achon ‘nâu, bơ ngai jang athei oei hơ drô̆ đang 14 năr tơ̆ hnam hô tel, đơ̆ng rŏng ‘noh hơ nơ̆ng răp hơ len lăng jơ hngơ̆m jăn lơ̆m 7 năr đơ̆ng rŏng dơ̆ng hơ drol kơ truh tơ̆ anih bơ̆ jang. Jên ăn oei hơ drô̆ tơ̆ hnam hô tel vă tang găn jĭ Covid-19 gô yua đơ̆ng tơ ‘ngla thuê bơ ngai jang kla ăn. ‘Ngoăih kơ bơ ngai jang bơ̆ jang lơ̆m dôm hnam kơ măy păng tơ gŭm tơ drong jang ŭnh hnam, Việt Nam păng Đài Loan (Trung Quốc) kŭm hlôi drơ̆ng nơ̆r vă păh buăl sơng iŏk bơ ngai jang găh tơ drong jang choh jang sa đơ̆ng Việt Nam.