Tơroi hăm khul jang, Bí thư Đảng dêh char Lâm Đồng Y Thanh Hà Niê Kđăm ăn tơbăt, đơ̆ng rŏng tơmât hơdai păng jang kiơ̆ trong jang Khul kơdră pơgơ̆r tơring 2 tăl, tơdrong jang mŭk drăm, tơpôl kơ dêh char đei ƀôh sơđơ̆ng ‘lơ̆ng. 6 khei blŭng sơnăm, mŭk drăm tŏk 7,9%; thu mong jên ăn teh đak hlŏh 18.800 ti; sơng iŏk dang 100 tơdrong jang, hăm kơsô̆ jên đei kĭ pơkăp tơlĕch jang vă jê̆ 200 rơbâu ti. Dêh char oei akŏm jơhngâm hơmet pơ ‘lơ̆ng dôm tơdrong tơhlăk ăn dôm tơdrong jang, hơtŏk hrĕnh tơdrong tơlĕch jên jang đơ̆ng teh đak, adrin jang tŏk đơ̆ng 10% tŏk tơ̆ kơpal lơ̆m sơnăm 2026.

Dêh char kŭm apinh Quân ủy Trung ương, Anih tơm vei lăng khul linh teh đak hơnơ̆ng tơrek truh, tơgŭm ăn Tơdrong pơjing trong pơgơ̆r jang, tơdrong tơgŭm hơdrô̆ vă atŏk tơiung kơmăy kơmŏk jang bô xít - alumin - nhôm. Pơma tơ̆ jơ bơ̆ jang, Đại tướng Nguyễn Tân Cương athei dêh char Lâm Đồng hơnơ̆ng tơiung tơdrong pran ‘lơ̆ng, hơdai hăm jang tŏk mŭk drăm păng vei kơjăp tơdrong sơđơ̆ng teh đak; hơtŏk tơdrong jang hơdoi đơ̆ng dôm khul linh mưh vei lăng tơring sơlam păng hơtŏk tơdrong sir chă, pôi akŏm kơting linh lôch tang ăn teh đak.