VOV4.Bahnar - Ƀlep ƀât tơ băt 75 sơ năm Năr linh jĭ rơ ka, linh lôch tang tĕh đak (27/7), Khul jang đơ̆ng Quân ủy Trung ương, Anih tơm vei lăng khul linh tĕh đak yoa Đại tướng Phan Văn Giang, Kơ dră jang lơ̆m Anih tơm Chinh trĭ, Phó Bí thư Quân ủy Trung ương, Kơ dră tơm vei lăng khul linh tĕh đak chĕp kơ̆l năm hơ pong, hơ păh tơ mam ăn Trung ương Khul linh so Việt Nam.

Tang măt ăn Quân ủy Trung ương, Anih tơm vei lăng khul linh tĕh đak, Đại tướng Phan Văn Giang tơ ƀôh đon bơ nê hăm dôm tơ drong plang hơ kâu, pơ yơ̆r jơ hngâm, tơ gop tih tên đơ̆ng rim jơ hnơr khul linh so hăm tơ drong tơ blăh iŏk rơ ngei hơ drĕch hơ drung, pơ jing đei 1 tĕh đak kơ jăp ‘lơ̆ng păng tơ drong jang tơ iung pơ jing, vei lăng tĕh đak Việt Nam xã hội chủ nghĩa.

Đại tướng Phan Văn Giang hơ pơi ‘mĕh tơ̆ hơ năp kơnh, Khul linh so Việt Nam păng Anih tơm vei lăng khul linh tĕh đak hơ nơ̆ng vei kơ jăp, tưk tơ iung tơ drong pơ vei ‘lơ̆ng hơ iă hăm băl. Rim jơ hnơr linh so Việt Nam hơ nơ̆ng pơ ngơ̆t, đei lơ tơ drong tơ gop kăp gĭt ăn tơ drong jang tŏk kơ Khul linh păng tĕh đak.

Dơ̆ng: Tơ blơ̆