VOV4.Bahnar - Pơ gê 28/3, Đại tướng Phan Văn Giang, Kơ dră tơm vei lăng khul linh tĕh đak pơ gơ̆r Hop akŏm kơ dră chĕp kơ̆l Anih tơm vei lăng khul linh tĕh đak khei 3/2022.  Hop akŏm akhan, khei 3/2022, Khul kơ dră chĕp kơ̆l Quân ủy Trung ương, Anih tơm vei lăng khul linh tĕh đak, pơ gơ̆r, pơ tho tơ ƀôh, tơ lĕch jang tôm tơ drong, hrơ̆ch ‘lơ̆ng păng jang kĕh rim tơ drong jang đei tơ lĕch.

Hop akŏm kơ dră chĕp kơ̆l Anih tơm vei lăng khul linh tĕh đak khei 3/2022

Pơ ma lơ̆m hop akŏm, Đại tướng Phan Văn Giang athei lơ̆m khei 4, đĭ đăng khul linh vei kơ jăp tơ drong trư̆k kơ chăng tơ blăh, băt hơ dăh, tơ dra hơ drol mă trŏ rim tơ drong; tơ tom roi tơ ƀôh, sek tơ lang ‘lơ̆ng tôm tơ drong, ưh gơ̆h lê̆ đei tơ drong ưh ê, ưh tom băt. Jang hơ doi vang vei kơ jăp tơ drong sơ đơ̆ng lơ̆m tĕh đak, tơm hlŏh jĭ năr Et soi kơ Ƀok Pơ tao Hùng, pơ dơ̆h lêh 30/4, 1/5; vei kơ jăp jơ trư̆k tơ gŭm dŏng tơ̆ jơ̆p tơ ring; hơ tŏk tơ drong pơ tâp pơ hrăm ăn rim bơ ngai păng Khul thi Army Games 2022. Atŭm hăm ‘nŏh hơ met mă ‘lơ̆ng, pơ gơ̆r kĕh tơ drong jang tơ bôl kơ khul linh vei lăng tơ ring sơ lam Việt Nam - Trung Quốc ‘măng mă 7.

Dơ̆ng: Tơ blơ̆