Kiơ̆ tơdrong tơchơ̆t đơ̆ng Thủ tướng teh đak, Trung tướng Trương Mạnh Dũng, Yŏng Khul linh Quân khu 1 đei pôk pơm Phŏ Kơdră jang tơgŭm kơ Khul linh. Thiếu tướng Trần Xuân Mạnh, Phŏ ƀok yŏng, Kơdră jang tơgŭm kơ Khul linh Quân khu 1 đei pơjao iŏk jang tơdrong jang pơm Yŏng Anih chĕp kơ̆l pơgơ̆r khul linh Quân khu.

Pơma tơ̆ hop akŏm, Đại tướng Phan Văn Giang chih răk, tơchĕng ‘lơ̆ng dôm tơdrong tơgop đơ̆ng Trung tướng Trương Mạnh Dũng mưh chĕp kơ̆l pơgơ̆r khul linh tơblăh lơ̆m Quân khu jang đang ‘lơ̆ng tơdrong jang, vei lăng kơjăp tơdrong sơđơ̆ng tơ̆ tơring, pơjing đon lui, đĭ đăng kon pơlei vang vei lăng teh đak kơjăp ‘lơ̆ng.

Hăm Thiếu tướng Trần Xuân Mạnh, Đại tướng athei hăm hơnăp jang ‘nao hơnơ̆ng hơtŏk đon rơgei, kŭm hăm khul chĕp kơ̆l Đảng, Anih chĕp kơ̆l khul linh Quân khu 1 akŏm jơhngâm chĕp kơ̆l pơgơ̆r bơ̆ jang ‘lơ̆ng tơdrong jang khul linh, vei sơđơ̆ng teh đak; hơtŏk tơdrong ‘lơ̆ng, akŏm jơhngâm tơblăh; kơchăng băt hơdăh rim tơdrong, ưh gơ̆h lê̆ đei tơdrong ưh ê. Atŭm hăm ‘nŏh, hơtŏk tơdrong pơjing tơring tơblăh tang găn, hơdai hăm jang atŏk tơiung mŭk drăm, tơpôl tơklep hăm vei lăng teh đak; vei kơjăp tơdrong mât mĭnh ƀơ̆r đon, hơtŏk đon ki luơ̆t, pơngơ̆t truh tơdrong arih xa kơ đe ƀô đô̆i, vang tơgop jang đang ‘lơ̆ng rim tơdrong đei pơjao.