Kơsơ̆ năr 26/8, tơ̆ dêh char Cao Bằng, Khul bơ̆ jang khul kơdră Đảng, Teh đak păng Hơnih tơm Ƀô̆ đô̆i vei lăng sơlam teh đak kơ yuơ Đại tướng Phan Văn Giang, Kơdră jang lơ̆m Hơnih tơm Chinh trĭ, Kơ iĕng Thủ tướng Teh đak, Yŏng Ƀô̆ đô̆i vei lăng sơlam teh đak pơm tơm Khul, vang năm păng pôk ăn Huy hiệu 80 sơnăm jang Đảng lơ̆m jơ ‘năr năr 2/9/2026 ăn kơ đảng viên Nguyễn Khánh Trung, tŏk bŏk hop akŏm lơ̆m Chi bộ koeng kơphô̆ Hoàng Tung, phương Thục Phán. Iung pơma tơ̆ pơm lêh, Đại tướng Phan Văn Giang hmach chơt hơ iă ăn kơ ƀok Nguyễn Khánh Trung đei sơng iŏk Huy hiệu 80 sơnăm jang Đảng, tơmam hơpah gĭt kăl hloh tơbăt ăn tơdrong tơgop tih tên lơ̆m tơdrong jang kĕch mang đơ̆ng Đảng. ‘Nou jei jing tơdrong hưch hanh hơmanh bơne kơ ŭnh hnam, pơlei pơla păng Đảng bộ dêh char Cao Bằng. Đại tướng Phan Văn Giang pơma hơdăh, yak hloh lơ hơnih jang, kơchư̆k bơ̆ jang, ƀok Nguyễn Khánh Trung ling lang vei kơjăp jơhngơ̆m đon chinh trĭ, mĭnh nơ̆r ƀơ̆r đon kiơ̆ Đảng, teh đak păng Kon pơlei; tơnăp, pơm juk yŭk trong hơlou, tơklep kơjăp hăm kon pơlei. Đơ̆ng rŏng pơdơ̆h bơ̆ jang teh đak, ƀok hơnơ̆ng vei kơjăp jơhngơ̆m đon ‘lơ̆ng, vang iung jang kơtang lơ̆m rim tơdrong jang kơ tơring, jĭ hơnih gơnang jơhngơ̆m đon kơ ŭnh hnam păng kon pơlei.