Hop akŏm hăm vang năm đơ̆ng bơngai tang măt ăn rim Hơnih bơ̆ jang, Hơnih tơm, Viện, hnam trương, tơring đei đak dơsĭ đei pơgơ̆r lơ̆m jơ ‘năr Khul kơdră chĕp pơgơ̆r Teh đak ‘nao tơlĕch Tơdrong tơchơ̆t kơsô̆ 218 găh Tơdrong iung jang jang kiơ̆ Tơdrong tơchơ̆t kơsô̆ 20 kơ Hơnih chep pơgơ̆r Trung ương Đảng jăl XIV găh tơ iung pơjing, atok tơ iung Việt Nam đei jing teh đak đei đak dơsĭ pran kơtang. Khoa học, kmăi kmŏk, tơplih ‘nao tơchăr păng tơplih kơsô̆ ưh khan đei sơkơ̆t hơdăh hơnăp jang kăl tơgum djru mă lei đei sơkơ̆t hơdăh jĭ mĭnh lơ̆m dôm tơdrong vă pơm hơtŏk kĕ jang kơ teh đak găh đak dơsĭ.

Ƀok Trần Tuấn Anh, Kơ iĕng Kơdră chĕp pơgơ̆r Viện Hàn lâm Khoa học păng Kmăi kmŏk Việt Nam akhan, mĭnh teh đak đak dơsĭ pran kơtang ưh khan lăp đei lơ dơnŏk duk, duk dăh mă đak dơsĭ să, mă kăl hlôh vao lơ lou, tơdra hơdrol păng vei lăng đei đak dơsĭ, iung jang sơđơ̆ng tơmam drăm păng pơm tơ-‘ngla kmăi kmŏk đak dơsĭ gơh hơgei.“Kăl tơ iung pơjing mĭnh trong chă tơchĕng hơlen teh đak tơpă, mĭnh teh đak đak dơsĭ pran kơtang ưh khan lăp lăng lơ̆m mĭnh hơnih tơm chă tơchĕng hơlen dăh mă mĭnh hơnih tơm, hơnih bơ̆ jang. Tơdrong jang chă tơchĕng hơlen đak dơsĭ đei vang iung jang đơ̆ng rim hơnih bơ̆ jang chă tơchĕng hơlen, rim hnam trương đăi hŏk, rim Hơnih tơm, hơnih jang bơ̆ jang teh đak, rim khul bơ̆jang lơ̆m đak dơsĭ, rim tơring tơter đak dơsĭ hơnih mơdro sa jang găh đak dơsĭ păng rim khul jang hơdoi”.

Jĭ dêh char đei rơvơn gĭt kăl găh đak dơsĭ, Khánh Hòa đei vă jê̆ 490 km jih đak dơsĭ, hloh 200 achon dơsĭ, rim ving jrŭ Vân Phong, Nha Trang, Cam Ranh păng Tơring kăl Trường Sa, atum hăm hơnih jang chă tơchĕng hơlen, pơtho pơhrăm tơm. Ƀok Nguyễn Thanh Hà, Kơ iĕng Kơdră chĕp pơgơ̆r Hơnih vei lăng kon pơlei dêh char Khánh Hòa tơbăt, jang kiơ̆ Tơdrong tơchơ̆t 20 kăl tơplih kơtang đơ̆ng năm jang đak dơsĭ jing vei lăng đak dơsĭ gơh hơgei, ‘moi kiơ̆ gơh hơgei păng kmăi kmok. Khánh Hòa apĭnh athei Trung ương lăng ba tơmơ̆t jên jang rim hơnih jang chă tơchĕng hơlen iok yoa hơdoi kâp teh đak nhen duk chă tơcheng hơlen đak dơsĭ jrŭ, hơnih jang chă tơchĕng hơlen tơm, hơnih jang kmăi kmok hơlen tŏ ‘mi kial hơgei; adoi lăng hơlen hơnhăk tơmơ̆t Hơnih tơm chă tơchĕng hơlen teh đak găh kmăi kmŏk đak dơsĭ tơ̆ Khánh Hòa lơ̆m pơprŏ hơnih jang tơm, hơnih jang pơlong năng tơm teh đak găh kmăi kmŏk tơm.“Dêh char Khánh Hòa pơkăp ‘măn khul jang kăl hloh, hơmet ăn hơnih, trong bơ̆ jang, trong hnam adoi nhen vang iung jang hơdoi kơjăp hăm rim hơnih tơm chă tơchĕng, hnam trương lơ̆m dêh char vă sơng iŏk, tơlĕch jang jơnei rim tơdrong vă jang chă tơchĕng, pơjao kmăi kmŏk.”

Kơdră chĕp pơgơ̆r Khoa hŏk păng Kmăi kmŏk Vũ Hải Quân sơkơ̆t hơdăh, Tơchơ̆t 20 tơlĕch ăn hơyak kăl hloh hăm khoa hŏk, kmăi kmok đak dơsĭ. Hơnih tơm Khoa hŏk păng Kmăi kmok gô vang pơchoh trong ăn Khul kơdră chĕp pơgơ̆r teh đak trong pơprŏ tơlĕch jang kiơ̆ Tơdrong tơchơ̆t 20, akom rơih iŏk rim tơdrong jang khoa hŏk, kmăi kmŏk, tơplih ‘nao tơchăr păng tơplih kơsô̆ đak dơsĭ jăl jang 2026-2030.“Hơnih tơm Khoa hŏk păng Kmăi kmok gô vang pơchoh trong ăn Khul kơdră chĕp pơgơ̆r teh đak tôch hơdăh trong pơprŏ jang tơlĕch jang kiơ̆ Tơdrong tơchơ̆t 20. Tơpă iŏk đei jơnei, đei lơ tơdrong đak dơsĭ să sap, hăp tơmơ̆t lơ loh lơ̆m khoa hŏk kmăi kmok ‘noh kơna jei tôch jơ̆p jang. Hơnih tơm Khoa hŏk, kmăi kmŏk gô hơdrin proh hơmet mă ‘lơ̆ng vă tơlĕch jang iŏk đei jơnei. Đei tơdrong bơ̆n kăl iung jangh lơ̆m đunh đai, mă hơlen mă lei đei tơdrong gơh tơmơ̆t jên jang hloi vă pơjing đei jơnei.”