Truh dang ei đei hloh 7.000 tơdrong vă jang kơ rim bơngai tơmơ̆t jên jang Trung Quốc oei đei iung jang tơ̆ Việt Nam, akŏp kon jên tơmơ̆t jang vă jê̆ 37 ti USD, akŏm lơ̆m pơm tơlĕch tơmam drăm, trong hnam, ŭnh hơyuh, điên tư păng kmăi kmŏk. Tơ̆ jơ tơƀơ̆p muh măt, Thủ tướng Lê Minh Hưng sơkơ̆t hơdăh: tơgoăt tơgoăl Việt Nam - Trung Quốc tŏk bŏk atŏk tơ iung tôch kơ ‘lơng, sơđơ̆ng, roi năr roi kơtang. Trung Quốc jĭ teh đak jang hơdoi mơdro sa tih hloh kơ Việt Nam; Việt Nam jĭ teh đak jang hơdoi mơdro sa tih hloh kơ Trung Quốc lơ̆m ASEAN. Tơbăt kơtơ̆ng ang găh dôm tơdrong tơplih hơdăh lơ̆m tơdrong jang mŭk drăm-tơpôl kơ Việt Nam khei năr ou ki, Thủ tướng pơma hơdăh, jăl ‘nao ưh khan lăp tơlĕch găh tơdrong jang hơdoi, tơmơ̆t jên jang “lơ hloh dơ̆ng” mă oei “ ‘Lơ̆ng hloh dơ̆ng” păng “Jơnei, tơpă hloh dơ̆ng". Thủ tướng athei rim hơnih mơdro sa Trung Quốc atok kơtang tơmơ̆t jên jang ‘lơ̆ng, kmăi kmŏk, kơjă tŏk kơtang păng tơplih ‘nao tơchăr; atŏk kơtang tơgoăt jang hơdoi, pơjing rơvơn ăn hơnih mơdro sa Việt Nam vang iung jang lơ̆m tĕch tơlĕch; tơmơ̆t jên jang kiơ̆ pơkăp ‘lơ̆ng, kơjăp; ve lăng năng tông tơdrong hơrih sa, đei iŏk yoa ăn bơngai jang păng jang kiơ̆ ‘lơ̆ng hơnăp jang ăn tơpôl. Khul kơdră teh đak Việt Nam gô hơnơ̆ng mơ̆ng, yak hơdoi, vei lăng năng tông tơdrong pơm tơm păng đei iŏk yoa trŏ lăp kơ bơngai tơmơ̆t jên jang; pơjing rơvơn vă hơnih mơdro sa tơmơ̆t jên jang, mơdro sa jơnei, kơjăp ‘lơ̆ng tơ̆ Việt Nam.