Hop akom kơ yuơ 6 tơring ‘noh rim phương Xuân Hương - Đà Lạt, Lâm Viên - Đà Lạt, Xuân Trường - Đà Lạt, Cam Ly - Đà Lạt, Lang Biang - Đà Lạt păng Lạc Dương vang pơgơ̆r, vă tơƀôh tơbăt dôm tơdrong đei, hơnăn tơdrong vă jang păng mơ̆ng nơ̆r pơma tơgop, athei đơ̆ng hơnih mơdro sa, bơngai tơmơ̆t jên jang.

Hăm hơgăt teh să 1.500 km², măt bơngai hloh 314.000 ‘nu, găh lơ̆m groi teh cham char Đà Lạt - Lạc Dương, 6 tơring đei tŏ ‘mi kial lei lăi, groi teh groi dang 1.500m, rơvơn ăn atŏk tơ iung tơmang pơhiơ̆, pơdơ̆h pơdei, choh jang sa hăm kmăi kmŏk hơgei, tơring kơdrơ̆m ‘lơ̆ng păng pơvih pơvăn ‘lơ̆ng gơh hơgei.

Lơ tơdrong vă jang tŏk bŏk đei krao hơvơn tơmơ̆t jên jang lơ̆m rim hơnih tơring kơdrơ̆m, mơdro sa, tơmang pơhiơ̆, trong hnam. Mă lei, hơnih mơdro sa akhan mĭnh ƀar tơdrong tơhlăk tơhlĭn kăl hrôih hơmet pơ ‘lơ̆ng. Ƀok Lê Văn Cường, Kơdră chĕp pơgơ̆r Kŏng ty TNHH Đà Lạt GAP tơƀôh hơdăh tơhlăk tơhlĭn yan ou găh groi teh:“Nhôn tŏk bŏk đei tơdrong tơhlăk tơhlĭn ‘noh teh ‘noh đei mă lei teh ‘noh teh ‘ngoăih mir đak lar tim mă ƀơk ăn hla bơar teh. Kơ yuơ lơ loh, mưh nhôn pơm mã tơring jei tơhlăk tơhlĭn, păng nhôn ‘meh kon jên jang vă tŏk iŏk đơ̆ng hơnih mong răk jên hu ‘noh hơnih mong jên pơkoel kăl đei muk drăm, đei hla bơar teh”.

Bro 5 phương Đà Lạt păng tơring Lạc Dương đei lăng jĭ groi teh măh mai, cham char atŏk tơ iung să mă lei dôm tơdrong đei tim mă iung jang kiơ̆ tơgăl. Đơ̆ng dôm tơdrong tơhlăk tơhlĭn mă hơnih mơdro sa tơbăt ăn, Kơ iĕng Kơdră chĕp pơgơ̆r Hơnih vei lăng kon pơlei dêh char Lâm Đồng Nguyễn Hồng Hải athei rim tơring păng hơnih bơ̆ jang dêh char kăl hơmet ăn mă tôm tong dơ̆ng mưh tơlĕch tơdrong vă jang krao hơvơn tơmơ̆t jang; dăr lăng hơlen trong pơprŏ jang, tơdrong tơchơ̆t, găh groi teh, pơm pơkeh hla bơar păng rim tơdrong ou to, veh ver đei tơdrong krao hơvơn đei bơngai tơmơ̆t jên jang bơih mă iung jang hơmet pơ ‘lơ̆ng tơhlăk tơhlĭn.“Ĭnh athei kơdră chĕp pơgơ̆r pơđăm phương hăm tơring Lạc Dương adoi nhen kơdră chĕp pơgơ̆r rim hơnih bơ̆ jang dêh char kăl dăr lăng hơlen dơ̆ng tơdrong tơchơ̆t pơprŏ tơring kơdrơ̆m. Dôm tơdrong lơ̆m ou hăm trŏ lăp ƀlep dôm tơdrong pơkoăl đơ̆ng bơngai tơmơ̆t jên jang ưh? Hơdrin iung jang mă kơjăp, vă ưh kơ lê̆ đei tơdrong đei bơngai tơmơ̆t jang drơ̆ng nơ̆r iung jang bơih, bơnbgai tơmơ̆t jên jang iung jang bơih đơ̆ng rŏng 'noh tă đei tơdrong pơgơ̆r hơmet pơ ‘lơ̆ng tơnap tap, tơhlăk tơhlĭn ăn tơdrong vă jang ‘noh.”

Đơ̆ng rŏng hop akŏm, kơdră chĕp pơgơ̆r dêh char Lâm Đồng athei rim tơring chih akŏm dôm nơ̆r tơgop đơ̆ng hơnih mơdro sa, hơlen hơdăh hơnăp jang hơmet pơ ‘lơ̆ng păng trĕng lăng dĭng truh jang keh đang. Dêh char Lâm Đồng pơkăp, hơnơ̆ng yak hơdoi, hơmet pơ ‘lơng tơnap tap kiơ̆ tơdrong tơchơ̆t khôi luơ̆t, pơjing rơvơn ‘lơ̆ng hơ iă vă rim tơdrong vă jang đei tơlĕch jang ‘lơ̆ng, jơnei.