Tơ̆ jơ bơ̆ jang, Tổng Bí thư, Kơdră chĕp pơgơ̆r teh đak Tô Lâm pơma hơdăh, tơdrong hop akom pơtôch jang kiơ̆ Tơdrong tơchơ̆t 26 kăl lăng hơlen mă tơpăt, tôm tong dôm tơdrong jang hlôi iŏk đei jơnei, tơƀôh hơdăh dôm tơdrong jang tim mă ‘lơ̆ng, tim mă lăp păng tơdrong tơm pơm ăn; adoi hơlen lăng dôm trong jang hlôi ‘lơ̆ng hơ iă, pơm trong kơnăl tơlĕch ăn rim trong jang, tơdrong jang găh bơ̆ jang kang ƀô̆ lơ̆m jăl ‘nao. Tổng Bí thư, Kơdră chĕp pơgơ̆r teh đak athei tơdrong hơlen pơtôch tơdrong jang kăl lăng truh dôm tơdrong yan ou, mă kăl ‘noh dôm tơdrong đei ƀôh dơ̆ng lơ̆m proh hơmet khul jang, pơjao jang păng tơdrong chĕp pơgơ̆r khul kơdră tơring. Dôm tơdrong tơbăt hơdăh pơtôch jang kiơ̆ kăl pơm hơdăh dôm tơdrong oei tơhlăk tơhlĭn, dôm tơdrong tơchơ̆t pă đei trŏ lăp vă apĭnh athei hơmet ming, tơmơ̆t dơ̆ng. Adoi, kăl hơnơ̆ng tơplih ‘nao pran kơtang bơ̆ jang kang ƀô̆ kiơ̆ trong rơih ƀlep bơngai, pơjao ƀlep tơdrong jang, lăng hơlen kang ƀô̆ hăm pơtôch jang kiơ̆ tơdrong jang; lăng kơjăp tơ iung pơjing khul kang ƀô̆ đei jơhngơ̆m đon chinh trĭ kơjăp, ‘lơ̆ng, bơ̆ jang gơh, trŏ lăp hăm atŏk tơ iung teh đak lơ̆m jăl ‘nao.