Kiơ̆ tơroi rơbăt, đơ̆ng blŭng sơnăm truh dang ei, Đắk Lắk đei vă jê̆ 4.200 ‘nu đei jĭ pơlŏ lĕch đe, tŏk vă jê̆ 40% pơting hăm khei ‘nou kơ sơnăm  2025. Kăl kơ lăng truh, dêh char hlôi đei 1 ‘nu lôch mă blŭng yua đơ̆ng jĭ pơlŏ lĕch đe lơ̆m sơnăm ‘nou tơ̆  phường Tân An.

Tơdrong tôch kơ bơngơ̆t ‘noh jĭ tơ̆ jơ năr jĭ blŭng, tơdrong đei ƀôh jĭ pơlŏ lĕch đe vă lĕi lăi hăm dôm tơdrong jĭ pơm ăn pơlŏ yuh hmă. Hơioh gô lăp yuh dêh, lăp rơmơ̆n, khơ̆m, sŏng sa ưh kơ lŭ, pơm ăn mĕ ƀă ƀônh kơ lăng pơhơi. Mă lei, mưh đĭ krê hơmơt bơih, jĭ gô đei ƀôh tôch kơ hrĕnh, lĕch pham dăh mă ưh kơ ‘lơ̆ng đĭ lơ̆m hơkâu. Ƀak si CKII Đặng Việt Nam, Khoa hơmet tôm tơdrong jĭ ăn Hơioh, Hnam pơgang tơm tơring Tây Nguyên, tơtă:

“Dôm bơngai ‘noh jĭ đe hơioh jĭ đei tơdrong jĭ đơ̆ng hơdrol dăh mă tŏk bŏk đei dôm tơdrong hơmet ưh kơ klăih ‘noh kăl kơ tởĕk truh hơlen lăng păng vei lăng mă ‘lơ̆ng, mă ưh ‘noh athei ƀĭch tơ̆ hnam pơgang hrôih hloh kơ dôm bơngai anai. Pơtih gia nhen hơioh rơkăh kĭ, hơioh đei dôm tơdrong jĭ hơmet ưh kơ klăih nhen tơdrong jĭ tơ̆ plei lĕn tŏk bŏk yua dôm pơgang găn pơrang jĭ... ‘Nâu jĭ dôm bơngai ưh pran jăng đơ̆ng hơdrol kơna mưh đei ƀơm jĭ gô ƀônh kơ jĭ ăl. Dăh mă dôm hơioh hơkĕ hơkong ưh kơ jăng, hơioh jĭ hiĕn hiang, jĭ plei nuih đơ̆ng nge.... Tơdăh khăm chă ƀôh jĭ pơlŏ lĕch đe ‘noh athei ƀĭch tơ̆ hnam pơgang hơmet hrôih”.

Tơ̆ hơnăp đei ƀôh jĭ pơlŏ lĕch đe tŏk lơ, Anih vei lăng kon pơlei dêh char Đắk Lắk hlôi athei rim anih jang kơpal păng tơring kơchăng tơlĕch jang dôm trong jang tang găn, ưh kơ lê̆ jĭ hơbuh đei ƀôh, lang să păng pơdui đunh.

Anih vei lăng găh jang pơgang đei pơjao pơm anih tơm kiơ̆ hơlen lăng tơdrong, hơtŏk loi dơ̆ng dăr lăng, tơroi tơbăt tơdrong krê hơmơt; athei Hơnih vei lăng tơdrong jĭ jăn dêh char jang hơdai hăm rim tơring hơmet pơ ‘lơ̆ng hơnih đei pơrang jĭ, pơlôch klanh, mur măih păng pruih pơgang pơlôch mur tơ̆ dôm hơnih đei hơmơt kơ jĭ lơ. Dôm hơnih khăm, hơmet jĭ athei kơchăng hơmet ăn bơngai jang, pơgang, tơmam kơmăy kơmŏk, giơng bơngai jĭ ƀĭch, hơtŏk ‘lơ̆ng tơdrong jang hơmet jĭ, tang găn bơngai jĭ ăl păng lôch răm.

Hơdai hăm anih jang pơgang, rim anih jang, khŭl grŭp păng khŭl kơdră tơring đei athei hơtŏk loi dơ̆ng tơroi tơbăt, krao hơvơn kon pơlei pơm rơgoh cham char, hŭt lê̆ tơmam mong đak, pơlôch klanh tŏ sĕt hloh 1 giĕng 1 ‘măng tơ̆ anih jang, hnam trưng hŏk, anih pơm tơlĕch, tĕch mơdro păng hơnih kon pơlei oei.

Rim xăh, phường pŭ hơnăp jang kơtă găh tơdrong jang tang găn jĭ lơ̆m tơring; dăr hơlen hơnih đei hơmơt kơ jĭ lơ, hơmet pơ ‘lơ̆ng tơtom bơngai jĭ, hơnih đei jĭ păng hơvơn rim khŭl linh vang bơ̆jang.

Jĭ pơlŏ lĕch đe ưh kơsĭ lai yơ kŭm pơm tơm ƀôh hăm tơdrong jĭ rơđăh ôh. Yua thoi noh, hơdai hăm tơdrong mơ̆t jang đơ̆ng anih jang kơpal, tơdrong kon pơlei kơchăng hŭt lê̆ hơnih mur chek lar, tang găn mur kăp păng ba hơioh năm khăm hrôih mưh đei ƀôh jĭ ‘noh jĭ trong kăl hloh vă tang găn jĭ jing ăl păng tang găn tơdrong hơ mơt kơ jĭ tơpoh lang să.