VOV4.Bahnar - Kơ sơ̆ 20/9, Khul jang đơ̆ng Anih pơ gơ̆r jang kơ Trung ương găh tang găn xa pơ jĭp, pơm glăi yoa Đại tướng Tô Lâm, Kơ dră jang lơ̆m Anih tơm Chinh trĭ, Phŏ Kơ dră Anih pơ gơ̆r jang kơ Trung ương găh tang găn xa pơ jĭp, pơm glăi chĕp kơ̆l đei jơ bơ̆ jang hăm Khul kơ dră chĕp kơ̆l Đảng dêh char Dak Nông.

Jơ bơ̆ jang đơ̆ng Đại tướng Tô Lâm tơ̆ dêh char Dak Nông

Kiơ̆ nơ̆r tơ roi đơ̆ng Khul kơ dră chĕp kơ̆l Đảng dêh char Dak Nông, tơ drong tang găn xa pơ jĭp, pơm glăi khei ‘năr âu ki, đei dêh char tôch tơ rĕk, pơ gơ̆r bơ̆ jang đei yoa ‘lơ̆ng. Dang ei Anih pơ gơ̆r jang tang găn xa pơ jĭp, pơm glăi kơ dêh char oei hơ len năng, pơ tho tơ ƀôh trong dăr hơ len hăm 16 tơ drong glăi tih tơ̆ tơ ring; chă ƀôh gơih ăn anih công an dăr hơ len 3 tơ drong nhen ƀôh đei pơm glăi iŏk pơ gâm kơ chư̆k, hơ năp gơ̆h jang mưh bơ̆ jang ăn tĕh đak. Dêh char đei 31 tơ drong glăi, hăm 52 ‘nu bơ ngai đei tơ kêng, dăr hơ len găh dôm tơ drong yoch xa pơ jĭp, mŭk drăm.

Pơ ma lơ̆m jơ bơ̆ jang, Đại tướng Tô Lâm athei tơ̆ hơ năp kơnh, dêh char hơ nơ̆ng hơ tŏk tơ drong chĕp kơ̆l pơ gơ̆r păng pơ gơ̆r bơ̆ jang, mă loi hăm 1,2 tơ drong tơm vă pơm hơ tŏk hlŏh dơ̆ng đon hlôh vao, hơ năp jang đơ̆ng dôm anih jang đảng, khul kơ dră tơ ring; bơ̆ jang ‘lơ̆ng trong jang hơ doi chă ƀôh, sek tơ lang dôm tơ drong yoch xa pơ jĭp, mŭk drăm; hơ tŏk hrĕnh tơ drong dăr hơ len, sek tơ lang dôm tơ drong yoch, bơ̆ jang hrơ̆ch ‘lơ̆ng dôm trong jang tang găn xa pơ jĭp, pơm glăi. Đại tướng Tô Lâm akhan, kŭm hăm hơ tŏk dôm trong tang găn, tơ blăh tơ drŭt khul pơm yoch, jang atŏk tơ iung mŭk drăm tơ pôl, dêh char athei tơ rĕk hlŏh dơ̆ng truh tơ drong jang tơ jur tơ nuh hin, vei lăng năng tông truh tơ drong arih xa ăn kon pơ lei.

Dơ̆ng: Tơ blơ̆