VOV4.Bahnar - Đại tướng Võ Nguyên Giáp - "Bơ ngai ‘nhŏng kơ dră" kơ Khul linh kon pơ lei Việt Nam, bơ ngai jang găh khul linh, bơ ngai jang chinh trĭ, bơ ngai jang tơ bôl tih đei kon pơ lei lơ̆m tĕh đak păng lơ̆m apŭng plenh tĕh ư hơ nhang. Tơ drong jang, kŏng tih tên păng jơ hngâm đon tơ păt ‘lơ̆ng đơ̆ng Đại tướng hlôi jing 1 um rup ưh kĕ lôch tôch lơ̆m jơ hngâm đon rim bơ ngai Việt Nam. Hăm kon pơ lei dôm hơ drĕch hơ drung ATK Bắc Sơn (Lạng Sơn), tơ drong Đại tướng năm hơ pong; dôm nơ̆r tơ tă păng tơ drong oei xa ‘lơ̆ng hơ iă, chơt rơ hău đơ̆ng Đại tướng ‘nŏh jĭ tơ drong hơ iă hlŏh păng jing jơ hngâm pran tih vă rim kon pơ lei tơ̆ plei kăch mang Bắc Sơn hơ nơ̆ng adrin lơ̆m tơ drong jang păng arih xa.

Mă đơ̆ng 27 sơ năm đĭ hlŏh bơih mă lei lơ̆m đon tơ chĕng đơ̆ng ƀok Dương Minh Thuận (sơ̆ pơm Phŏ kơ dră Anih krao hơ vơn kon pơ lei kơ Anih jang đảng dêh char Lạng Sơn) oei ƀlŏk hơ nơ̆ng um rup Đại tướng Võ Nguyên Giáp tơ̆ cham đă ƀŏng lŏng Bắc Sơn kơ sơ̆ dŏh sơ̆. Ƀok Thuận jĭ bơ ngai chơt hơ iă đei sơng Đại tướng Võ Nguyên Giáp ƀât jâng kung gre vơ vêl kơ sơ̆ 26/9/1995 ƀât Đại tướng năm hơ pong tơ̆ plei Bắc Sơn – Tơ ring sơ đơ̆ng kơ Trung ương lơ̆m khei ‘năr iung tơ blăh Phalăng. Pơ gê đơ̆ng rŏng, Đại tướng đei jơ pơ ma nuh hăm kon pơ lei dôm hơ drĕch hơ drung păng đe linh lơ̆m khul linh tơ blăh.

Lơ um rup Đại tướng Võ Nguyên Giáp mă đơ̆ng so bơih mă lei oei tơ ƀôh hơ dăh bưng ai tih đơ̆ng ƀok yŏng đei ư hơ nhang kơ hơ drĕch hơ drung đĕch

Ƀok Thuận ăn tơ băt: “Đại tướng tơ tă Bắc Sơn jĭ apŭng đei tơ drong juăt jang kăch mang bơih, mă lei athei jang tŏk vă sut pơ đĭ pơ ngot, tơ jur tơ nuh hin, jang tŏk jing pơ drŏng dơ̆ng. Đang kơ ‘nŏh Đại tướng apinh Đảng ƀô̆ Kon pơ lei Bắc Sơn hăm drơ̆ng nơ̆r ưh, rim bơ ngai lơ̆m cham đă ƀŏng lŏng ưh đei bu khan kơ bu, hrơ̆ch tơl 1 nơ̆r, drơ̆ng, hơ ngăh hăm Đại tướng. Mưh pơ ma đang lơ̆m jơ mít tinh, Đại tướng truh tơ ƀâp, pơ ma nuh hăm mih ma duch nă hăm nơ̆r bơ ngai Tày Bắc Sơn.”

Tơ̆ Anih ‘măn răk tơ mam iung tơ blăh Bắc Sơn hrei ‘nâu oei vei lơ chư chih, um rup ƀât Đại tướng Võ Nguyên Giáp năm hơ pong tơ̆ Bắc Sơn sơ năm 1995 kŭm hăm lơ nơ̆r tơ tă ăn khul linh păng kon pơ lei Bắc Sơn athei "tưk tơ iung tơ drong juăt đơ̆ng pơ lei kơ tang nuih mơng, pơ jing apŭng jing 1 apŭng tơ năp ‘lơ̆ng kơ dêh char"; ‘Long "hơ ra" đei Đại tướng pơ tăm năr ‘nŏh sơ̆, dang ei oei jing ‘lơ̆ng, tôch rơ ngơp lơ̆m cham Anih ‘măn răk tơ mam.

Kăn ƀô̆ tơ̆ Anih ‘măn răk tơ mam iung tơ blăh Bắc Sơn roi tơ ƀôh ăn tơ moi chă tơ mang lăng ‘Long Hơ ra đơ̆ng Đại tướng Võ Nguyên Giáp pơ tăm ‘năr 27/9/1995

Mŏ Phạm Thị Thanh Hà, kăn ƀô̆ tơ̆ Anih ‘măn răk tơ mam iung tơ blăh Bắc Sơn, čhưu jơ hngâm pơ ma: “Anih ‘măn răk tơ mam kŭm jing 1 anih ƀrê hăm tơ moi chă tơ mang lăng mưh truh tơ̆ Bắc Sơn. ‘Nâu jĭ dôm tơ mam, hla ar tơm dơ nơm mă kăn ƀô̆ tơ̆ anih ‘măn răk chă akŏm, vei lăng, vang tơ gop, pơ tho tơ ƀôh tơ drong juăt ăn kon pơ lei, mă loi jĭ hăm jơ hnơr mơ lôh hơ nơ̆ng chĕp răk, băt hơ dăh kŏng tih tên đơ̆ng dôm bơ ngai kơ tang nuih mơng. ‘Nâu jĭ tơ drong hưch hanh đơ̆ng Đảng ƀô̆, khul kơ dră pơ gơ̆r păng kon pơ lei dôm hơ drĕch hơ drung apŭng Bắc Sơn mưh đei Đại tướng truh ngôi. Tơ moi chă tơ mang lăng truh tơ̆ âu đa tơ lĕch lơ nơ̆r apinh găh Đại tướng, mă loi hăm đe ŏh hŏk tro, đe ŏh tôch ‘mĕh băt, tôch hơ iă mưh chă apinh hơ len năng truh Đại tướng Võ Nguyên Giáp.”

Vă jê̆ 10 sơ năm Đại tướng vih hăm đe bôl boăl kơ tang nuih mơng chu lôch tang ăn tơ drong rơ ngei kơ tĕh đak. Bơ̆ jang kiơ̆ nơ̆r tơ tă đơ̆ng Đại tướng, kon pơ lei dôm hơ drĕch hơ drung păng kăn ƀô̆, linh lơ̆m khul linh tơ blăh kơ Bắc Sơn hơ nơ̆ng mât 1 ƀơ̆r đon, adrin jang atŏk tơ iung mŭk drăm, tơ pôl, vei kơ jăp tơ drong sơ đơ̆ng tĕh đak tơ̆ tơ ring tĕh juăt jang kăch mang âu.

                Dơ̆ng: Tơ blơ̆