VOV4.Bahnar – Đơ̆ng xơnăm 2009 truh dang ei, đak krong Pa (jăl ro găn dêh char Gia Lai) tơplih thong ro đak pơm hơlih kơ hrĕng hectar teh choh jang xa păng pơjuă lơ tơring kon pơlei oei xa tơ̆ apŭng Krông Pa, dêh char Gia Lai. Tơ̆ anăp, apŭng Krông Pa adrô̆ tơlĕch dôm trong jang tơtenh vă dăh ‘nhăk kon pơlei truh anih oei xơđơ̆ng.

Kon pơlei Pơlei H'Lang hơmet yông truh anih oei tang găn teh hơlih (Rup: Nguyễn Thảo).jpg

Dơ̆ng lăng thong đak ro kơdraih, ƀok Rơ Lah Kem tơ̆ xăh Chư Rcăm, apŭng Krông Pa, tơhôih xơ ‘ngon: 1 ha teh kơ unh hnam atŭm hăm pơhlom 100 ha teh kon pơlei tơ̆ pơlei H’Lang hlôi ƀơm đak krong Pa “loăn lăng” bơih: “Adrol ki, 1 ha inh đei yua đơ̆ng 5 truh 6 tâ̆n. Teh dang ei hơlih pơđĭ bơih, đak tơhiu pơgoh. Lơ unh hnam tơ̆ âu năm tơ̆ nai bơih, đe athei jăk đĕch, anih âu jê̆ hơlih pơđĭ bơih. Kon pơlei tơ̆ âu jăk tơ̆ nai bơih”

Ƀok Hà Văn Đường, Kơdră Anih vei lăng kon pơlei xăh Chư Rcăm ăn tơbăt, ‘nguaih 100 ha teh choh jang kơ kon pơlei tơ̆ pơlei H’lang hiong răm đĭ đăng, tơdrong mă teh rok jih đak krong Pa hơlih tŏk bŏk oei pơjuă truh tơdrong erih kơ hloh 100 unh hnam kon pơlei tơ̆ âu. Gơng Lệ Bắc, tơroh 2 xăh Chư Rcăm păng Ia Rsươm hlôi ƀơm hơlih truh ăh jrăng pơtoi 2 păh găh âu găh to.

Hloh 100 ha teh choh jang xa kơ kon pơlei tơ̆ pơlei  H'lang hlôi hơlih jing dơnâu đak krong Pa  (Rup: Nguyễn Thảo).jpg

Vă vei xơđơ̆ng ăn kon pơlei, ăh jê̆ đĭ xơnăm 2020, Anih vei lăng kon pơlei apŭng Krông Pa hlôi kĭ pơkăp tơdrong Axong ming man tơdrong kăl, xơđơ̆ng tơdrong erih kon pơlei tơ̆ pơlei H’Lang, hơgăt teh xă jê̆ 7 ha vă yông oei tơ̆ nai hăm hloh 102 unh hnam kon pơlei Jrai lơ̆m tơring teh hơlih. Anih vei lăng kon pơlei xăh Chư Rcăm duh hlôi pơtrruh nơ̆r ăn apŭng chă trong pơkăp axong teh choh jang ăn kon pơlei kon kông mă ƀơm hiong đơ̆ng teh hơlih: “Dang ei, hăp noh thong đak ro tơm kơ đak krong Pa noh hăp phă pơrăm tơring noh. Găh âu, hăp pơrăm truh tơ̆ pơxat păng tơring kon pơlei oei xa noh athei pơkăp yông tơ̆ nai đĕch. Hăp pơrăm tih tên, dang hiong pơđĭ dôm hơgăt teh kơ dôm unh hnam choh jang tơ̆ jih đak krong. Tơnap noh teh choh jang xa kơ xăh Chư Rcăm ưh đei lơ, dang ei athei hơmet teh huach, hơmet teh choh jang ăn kon pơlei”

Tơdrong erih kon pơlei ƀơm pơjuă, choh jang xa hiong răm, mă lei tam đei trong jang vă tang găn (Rup: Nguyễn Thảo).jpg

Ƀok Hồ Văn Thảo, Kơdră Anih vei lăng kon pơlei apŭng Krông Pa ăn tơbăt, apŭng đei 13 anih hơlih rok kiơ̆ ataih pơhlom 45 km tơring đak krong Pa ro găn 8 xăh, thĭ trâ̆n. Jăl hơlih kơtang hloh noh tơ̆ 2 xăh Ia Rsai păng Chư Rcăm. Khei năr âu ki, lơ̆m tơdrong mă jên axong jang ưh đei lơ kơ apŭng hin dơnuh, tơring pơtơm akŏm vei xơđơ̆ng ăn kon pơlei hăm tơdrong tơlĕch dôm tơdrong yông ‘nhăk kon pơlei tơ̆ anih hơlih truh oei anih xơđơ̆ng. Kiơ̆ kơ noh, jăl xơnăm 2012-2014, apŭng axong hloh 870 măt bơngai tơ̆ 4 pơlei kơ xăh Ia Rsai. Xơnăm 2019, apŭng pơtoi tơdrong pơkăp ‘nhăk 31 unh hnam kon pơlei hăm 166 măt bơngai tơ̆ 2 xăh Ia Rsươm păng xăh Ia Rsai. Xơnăm 2020 truh dang ei, pơtoi tơlĕch yông hloh 102 unh hnam kon pơlei tơ̆ pơlei H’Lang. Truh dang ei, tơdrong mă teh hơlih rok kiơ̆ thong đak krong Pa duh oei ƀôh rim kơ năr mă tam đei trong jang vă tang găn. Ƀok Hồ Văn Thảo ăn tơbăt: “Kơplăh âu noh athei vei xơđơ̆ng tơdrong erih, mŭk drăm ăn kon pơlei, mŭk drăm kơ teh đak noh athei tơrĕk kơsô̆ 1. Jên ‘măn dơ̆t pơnơ̆ ăn pơlei H’lang noh vă dăh yông kon pơlei mă tenh, oei dơ̆t pơnơ̆ dôm hrĕng met noh đĭ kơ rơtăl hlj. Anih vei lăng kon pơlei apŭng hlôi chih hơlen tôm vă chih măt hăm Anih vei lăng kon pơlei dêh char, dêh char pơtruh ăn Anih tơm Choh jang xa păng Hơtŏk tơring pơxĕl”.

Jơnŭm pơgơ̆r tơring duh nhen kon pơlei Krông Pa, Gia Lai, hơpơi ‘moih dôm jăl jang đơ̆ng trung ương truh tơ̆ tơring dăh hrôih đei trong jang kăp gĭt vă xek tơlang tơnăp tơdrong mă teh hơlih tơ̆ đak krong Pa, vei xơđơ̆ng ăn tơdrong erih kon pơlei.