Pơgê 21/4, tơ̆ pơlei tơm Buôn Ma Thuột, Anih vei lăng kon pơlei dêh char Dak Lak, Khŭl bơngai pơnă ‘mêm kơ teh đak pơgơ̆r lêh tơbăt 50 sơnăm pơ dreo bơngai pơnă kiơ̆ Tơdrong tơchơ̆t Paris (1973 – 2023). Vang truh pơm lêh tơbăt đei hloh 150 ‘nu lĭnh pơnă, bơngai jang chĭnh trĭ đei ayăt rôp phak lơ̆m ‘măng tơblăh vang tơ jră Mi dŏng teh đak.

Tơ̆ lêh tơbăt, dôm bơngai tang măt hlôi vang hơdai băl tơroi dơ̆ng tơdrong joăt joe iung tơblăh kơtang đơ̆ng bơngai lĭnh kach mang Việt Nam. Tang măt kơdră chĕp kơ̆l dêh char Dak Lak hlôi gơih nơ̆r bơnê truh đe bơngai pơnă sơ̆ ‘mêm kơ teh đak, ‘meh đe sư hơnơ̆ng plang jơhngơ̆m kŭm nhen vang tơgŭm tơdrong hlôh vao vă jơhnơr mơ lôh hơtŏk jơhngơ̆m đon kach mang lơ̆m pơ jing vei lăng Teh đak. Hơdai hăm gơih nơ̆r apĭnh jet gia truh ŭnh hnam, bôl buăl păng pôk hơpăh dôm tơmam ăn kơ dôm bơngai pơnă sơ̆.