VOV4.Bahnar - Kơdră chĕp pơgơ̆r Dơnŏ anĭh vei lăng Mơdro sa dêh char Dak Lăk tơbăt, tơ̆ hơnăp lơ hơnih tĕch đak xăng đak dau lơ̆m tĕh đak tang ‘măng, pơdơ̆h tĕch mơdro, Khŭl vei lăng Hơnĭh tĕch mơdro dêh char Dak Lăk hlôi atŏk kơtang vei lăng, dăr lăng tơdrong mơdro đak xăng đak dau lơ̆m dêh char păng ƀô̆h lơ hơnĭh tĕch mơdro đak xăng đak dau tang ‘măng.

Mă hơdăh, Hơnĭh vei lăng Mơdro sa hlôi ƀô̆h 19 hơnĭh tĕch mơdro đak xăng đak dau tŏk bŏk pơdơ̆h, ư̆h tĕch mơdro. Lơ̆m mă nŏh, đei 16 hơnĭh tĕch mơdro hlôi pă đei đak xăng đak dau, 3 hơnĭh pơdơ̆h tĕch kơ yuơ bơngai tĕch jĭ, tơngla hơnĭh tĕch mơdro F1 păng hư kmăi ƀôm đak dau đak xăng. Rim hơnĭh tĕch mơdro đak xăng đak dau pơdơ̆h jang găh rim apŭng Cư M’gar, Krông Năng, Buôn Đôn, pơlei tơm Buôn Ma Thuột. Lơ̆m khei năr kơnh, Dơnŏ anĭh Vei lăng Hơnĭh mơdro sa dêh char Dak Lăk gô atŏk kơtang dăr lăng tơdrong tech mơdro đak xăng đak dau vă tơtom đei nơ̆r athei, apĭnh vă hơmet pơ ‘lơ̆ng tơnap tap ăn rim hơnĭh mơdro sa, adoi hrôih ƀôh păng xek tơlang kơ hret dôm chă hơlĕnh vă tĕch mơdro măt đơ̆ng rŏng au kơnh.

Tơblơ̆ nơ̆r: Amazưt