Đơ̆ng rŏng kơ tơmât hơdai dêh char, tơ̆ dôm jăl trong gre tơƀưh đơ̆ng tơring Hơlĕch  hăm tơring Pơmât kơ dêh char Đắk Lắk tơmam pơtơm đei chơ chuĕn roi ‘lơ̆ng. Tơmam đơ̆ng choh jang xa đei kơ tơring Pơmât kiơ̆ gre jur tơ̆ đak dơsĭ, ka hơdang đơ̆ng tơring Hơlĕch chơ tŏk dơ̆ng tơ̆ tơring groi kông; hơdai hăm ‘nŏh, kơsô̆ tơmoi chă tơmang lăng đơ̆ng tơring Pơmât jur tơ̆ tơter tơter đak dơsĭ kŭm roi tŏk, pơjing đei lơ trong yak vih vât “jur  tơ̆ đak dơsĭ – tŏk tơ̆ kông” hơnơ̆ng đei lơ bơngai. Kŭm hăm dôm ‘măng chơ chuĕn tơmam ‘nŏh jĭ dôm tơdrong tơƀâp, pơma nuh, kĭ pơkăp hla ar jang hơdoi đơ̆ng dôm anih tĕch mơdro kơ 2 păh.

Yă Nguyễn Thị Nga, Kơdră vei lăng Khul drŏ kăn tĕch mơdro Phú Yên tơroi, đơ̆ng rŏng kơ tơmât hơdai, tơdrong tĕch mơdro đơ̆ng Tơring Hơlĕch – Pơmât tŏk vă jê̆ 1 puăt pơting hăm adrol ki – 1 kơsô̆ ăn ƀôh “đak dơsĭ” păng “bri kông” oei rôp ti băl lơ̆m 1 anih jang mŭk drăm kơjăp ‘lơ̆ng: “Nhôn mât hơdai đei đon hlôh vao băl, chă hơlen năng tơdrong tĕch mơdro, găh Hơlĕch chă hơlen năng tơdrong choh jang xa, oei găh Pơmât ‘nŏh hơlen năng găh ka hơdang. Dang ei inh ƀôh rim bôl boăl  tơ̆ găh Pơmât Đắk Lắk hlôi, tŏk bŏk chă jur tơ̆ tơring Hơlĕch răt ka hơdang păng chă tơmang lăng tôch lơ.”

Kŭm hăm tơdrong yak vih vât, chơ chuĕn tơmam đơ̆ng Hơlĕch - Pơmât, tơmoi chă tơmang lăng kŭm yak kiơ̆ vă gơ̆h iŏk yoa pơđĭ dôm tơdrong ‘lơ̆ng đơ̆ng “mĭnh dêh char – 2 cham char bri brăh”. Sơnăm 2026, Đắk Lắk pơjing hơnăn “Chă hơlen năng tơdrong ‘lơ̆ng rŏ tơ̆ jơ̆p tơring”, iŏk yoa dôm kơjă kăp gĭt găh tơmam drăm păng jơhngâm đon, năm truh đon pơhnŏng sơng 8 triu ‘nu tơmoi, iŏk yoa truh 16 rơbâu ti hlak jên. Tơdrong hơiă đơ̆ng Đắk Lắk gô đei păr ang pran kiơ̆ đơ̆ng 41 tơ̆p phim “Đắk Lắk năm truh ‘nŏh hưch hloi” pơih lơ̆m lơ kênh, tơƀôh hơdăh 1 anih dơ̆ng đei ƀĕnh tơdrong ‘lơ̆ng găh tơmam xa, kon bơngai păng cham char bri brăh ‘lơ̆ng rŏ.

Ƀok Trần Hồng Tiến, Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng dêh char Đắk Lắk ăn tơbăt, dêh char vă pơgơ̆r lơ tơdrong chă tơmang lăng kiơ̆ 4 pơyan, tơklep hăm lêh, Têt păng dôm ‘măng pơdơ̆h đunh năr, pơjing trong jang xa sơđơ̆ng ‘lơ̆ng prăt sơnăm. Kŭm hăm ‘nŏh jĭ hơtŏk tơdrong roi tơƀôh um rup, tơlĕch lơ tơmam păng pơgơ̆r chă tơmang lăng tơ̆ kơmăng, hơdai hăm trong yak đơ̆ng bri kông jur truh tơ̆ đak dơsĭ.

“Hrei ‘nâu Đắk Lắk kŭm kĭ pơkăp jang hơdoi hăm dôm dêh char nhen Khanh Hòa, Lâm Đồng, Gia Lai, Hà Nội, plt Hồ Chí Minh, Đà Nẵng. Hăm Khánh Hòa ‘nŏh nhôn akŏm jơhngâm sơng tơmoi đơ̆ng apŭng plenh teh đơ̆ng Khành Hòa tŏk tơ̆ Đắk Lắk mă loi jĭ đơ̆ng rŏng kơ trong gre kơdâu hrĕnh pơm đang, nhôn vă akŏm roi tơƀôh um rup Đắk Lắk vă pơm thoi yơ gơ̆h đei lơ tơmam chă tơmang lăng ‘nao, sơng đei tơmoi đơ̆ng teh đak đe truh tơ̆ Khánh Hòa tŏk ngôi hloi tơ̆ Đắk Lắk”

Vă dôm tơdrong jang mŭk drăm kơ dêh char Đắk Lắk ‘nao jang tŏk hiôk hian, trong nơnăm kơ dêh char đei pơm hơmet roi ‘lơ̆ng. Trong gre kơdâu hrĕnh Khánh Hòa – Buôn Ma Thuột hlôi ăn gre ki thuơ̆t kơdâu bơih, Trong gre 14 trong ver găh Hơlĕch Buôn Ma Thuột hlôi ăn gre kơdâu, trong gre kơdâu hrĕnh Quy Nhơn – Chí Thạnh kŭm vă jê̆ truh năr et hơtŏk, tơmât yoa bơih.

Kiơ̆ ƀok Trần Đình Long, sơ̆ pơm Phŏ Kơdră Anih chih pơjing luơ̆t kơ Quốc hội, mưh anih jang đei tưk tơiung ‘lơ̆ng roi xă păng trong yak vih vât đei pơm đang, tơdrong chơ chuĕn tơmam, pơtruh bơngai jang păng tưk tơiung tĕch mơdro – pơvih pơvăn gô pơjing đei lơ tơdrong ‘lơ̆ng, mă loi hăm rim tơring oei jang tŏk hiơ̆ hyĭn adrol ki.

“Đơ̆ng Tuy Hòa păng Buôn Ma Thuột đei tơdrong găn trong ƀât tŏk bŏk anih, mă anih tŏk bŏk ‘nŏh dang ei jang tŏk oei tôch hiơ̆, mă tơpă ‘nâu jĭ tơring đei năng tôch ‘lơ̆ng. Dang ei 1 dêh char jĭ mĭnh ‘nŏh ưh jor gô ưh pă đei tơring hơtăih yăih kiơ bơih. Mưh pơm đei trong yak vih vât tơƀưh rim tơring, tơdrong chơ chuĕn tơmam, pơtruh bơngai jang, atŏk tơiung tĕch mơdro – pơvih pơvăn gô đei pơih xă jing tơdrong tôch ‘lơ̆ng. ‘Nâu jĭ tơdrong pran ‘lơ̆ng mă dang ei bơ̆n pơtơm iŏk yoa.”

Yak mât lơ̆m jăl jang 2025–2030, Đắk Lắk chih hơdăh jang tŏk pran ‘moi kiơ̆ trong nơnăm, anih jang gĭt kăl, hơmet ming trong pơm hla ar păng anih tĕch mơdro, tơmât jên jang hiôk hian. Kơdră vei lăng kon pơlei dêh char Đắk Lắk, ƀok Tạ Anh Tuấn ăn tơbăt, hăm tơdrong tơm ‘nŏh tơƀưh anih jang xa đơ̆ng bri kông truh tơ̆ đak dơsĭ, dêh char vă pơjing trong jang pơm hơtŏk kơjă đơ̆ng chă tơmang lăng, choh jang xa, jang ‘long, rong ka hơdang pran ‘lơ̆ng:

“Tơguăt tơring Groi kông hăm Tơring Tơter đak dơsĭ păng dôm tơring ‘moi kiơ̆ trong tơm vă tưk tơiung jang kơmăy, choh jang xa hăm kơmăy kơmŏk ‘nao păng chă tơmang lăng, pơvih pơvăn logistis. Mă 2 ‘nŏh pơjing păng tưk tơiung kơjă  tơmam đơ̆ng tơmât hơdai choh jang xa, jang ‘long, rong ka hơdang kiơ̆ trong tơring găh Pơmât groi kông jĭ tơring pơtăm tơmam tơm vă pơyoa ăn tơdrong choh jang xa hăm kơmăy kơmŏk ‘nao, jang unh hơyuh rơgoh păng pơm tơlĕch tơmam đơ̆ng choh jang đei, oei tơring găh Hơlĕch ‘nŏh jĭ tơring pơm hơmet pơ ‘lơ̆ng tơmam, jang logistis păng iŏk yoa ‘lơ̆ng tơdrong pran ‘lơ̆ng đơ̆ng jang mŭk drăm đak dơsĭ.”

Sơnăm ‘nao hơnhăk ba đon lui kơ 1 Đắk Lắk jang tŏk pran, tơring bri ‘long tơƀâp đak dơsĭ, tơring mă dôm trong gre oei pơih trong ăn đon hơmĕng jang tŏk pran, vă tơring groi kông – tơring tơter đak dơsĭ kŭm yak hơdai lơ̆m 1 jăl trong jang tŏk pran, kơjăp păng đei ƀĕnh tơdrong hơmĕng.