Kơsơ̆ 30/6, tơ̆ ‘măng hop akŏm pơma dơnuh ‘Măng hop akŏm mă 2 Jơnŭm pơgơ̆r kon pơlei dêh char Đắk Lắk jăl X, lơ bơngai tang măt athei jăh hơmet pơ ‘lơ̆ng dôm tơdrong tơhlăk găh tơmơ̆t jên jang teh đak, teh, hla ar bơ̆jang păng tơplih ‘lơ̆ng hơnih tơmơ̆t jên jang vă iŏk đei tơdrong hơgăt jang tŏk GRDP hloh 10% lơ̆m sơnăm 2026. Dôm bơngai tang măt akhan đơ̆ng kơsô̆ tŏk 7,84% hrei ‘nâu, Anih vei lăng kon pơlei dêh char kăl kơ jăh pơjing trong jang tŏk hơdăh, băt rơđăh dôm tơdrong jang ‘lơ̆ng, jên tơlĕch jang păng trong jang tŏk pran.

Đơ̆ng rŏng kơ tơbăt hơdăh Trong tơproh jang kơ dêh char păng pơgơ̆r jơnei Hop akŏm pơtrŭt tơmơ̆t jên jang hăm 25 tơdrong jang đei asong hla ar pơkăp, akŏm jên hloh 40.200 ti hlak jên, Đắk Lắk tŏk bŏk đei lơ tơdrong hiôk hơtŏk tơiung. Mă lei, dôm bơngai tang măt pơma hơdăh dôm tơdrong hiôk âu lăp kĕ jing tơdrong ‘lơ̆ng jang tŏk mưh dôm tơdỏng tơhlăk găh tơmơ̆t jên jang, trong tơproh jang, teh păng trong bơ̆jang đei hơmet pơ ‘lơ̆ng tơtom.