Hloh đơ̆ng dăr lăng, dêh char tơmơ̆t 396 hơnih ming man, tơdrong vă jang lơ̆m tơdrong kăl dăr lăng, xek tơlang. Truh dang ei, rim hơnih bơ̆ jang hlôi hơmet pơ ‘lơ̆ng tơnap tap, tơhlăk tơhlĭn ăn 258 tơdrong vă jang. Hơdrô̆ dôm tơdrong vă jang ‘ngoăih kon jên jang teh đak tơmơ̆t jang, hlôi xek tơlang 193 lơ̆m akŏp 200 tơdrong vă jang, adoi ăn pơdơ̆h 8 tơdrong vă jang iung jang ưh kơ iŏk đei jơnei, iŏk tơvih 91ha teh. Kơdră chĕp pơgơ̆r Đảng dêh char Đắk Lắk Lương Nguyễn Minh Triết athei hơnơ̆ng dăr lăng, lăng hơlen tơdrong vă jang kiơ̆ tơdrong tơhlăk tơhlĭn lơ liơ, xơkơ̆t hơdăh hơnih bơ̆ jang păng bơngai chiu pŭ, ưh kơ lê̆ hô sơ dĕch dăr, tơpŭ dih băl dăh mă veh ver chiu pŭ. Dôm hơnih, bơngai đei ƀôh pơm glăi kăl hơmet pơ ‘lơ̆ng tơnap tap hloi, adoi xek tơlang kơhret hloi tơdrong chiu pŭ kiơ̆ tơdrong tơchơ̆t. Kơdră chĕp pơgơ̆r dêh char athei jang keh đang hơlen, pơjao xek tơlang hơdrol năr 30/9; adoi pơrô̆ athei tơ-‘ngla tơmơ̆t jên jang, hơnih iŏk ming man atŏk kơtang iung jang ming man.