Sơnăm 1996, ‘nhŏng Xuin pơm juk yŭk trong hơlou hơnhăk ‘long chehphe chă pơtăm lơ̆m mir, tơplih ăn choh jang sa joăt joe jơmul pơtăm ƀa hơƀo, tôl plui. Dôm sơnăm blŭng kơ yuơ tim mă băt kih thuơ̆t vei lăng, chehphe ưh kơ gan plei lơ. Ưh kơ lao đon, ‘nhŏng hơdrin chă hŏk pơhrăm, vang năm hŏk rim lăm pơtho khoa hok, kih thuơ̆t, năm tơmang lăng rim mir pơgar đe jang chehphe vă hŏk pơhrăm jang kiơ̆ lơ̆m mir pơgar kơdih ... Gơnơm đơ̆ng noh, đơ̆ng 300 sơnơm chehphe pơtăm blŭng a, truh dang ei ‘nhŏng Xuin hlôi pơih să truh 5ha chhphe, lơm mĭnh sơnăm iŏk đei hloh 20 tân chehphe găr.

Ưh khan lăp jang sa hơgei, ‘nhŏng oei tơnăp dôm tơdrong jang lơ̆m tơring. Đơ̆ng mĭnh Ƀĭ thư Chi đoàn jang tơnăp, ‘nhŏng đei tơmơ̆t jang Đảng. Sơnăm 2010, hăm hơnăp jang ‘lơ̆ng, ‘nhŏng đei kon pơlei pôk tơmơ̆t pơm thôn trơng, đơ̆ng rŏng ‘noh đei pôk tơmơt jang Ƀĭ thư Chi ƀô̆ pơlei Kdăng. ‘Nhŏng Xuin ling lang tơchĕng truh tơdrong hơrih sa đunh đai tai sơnăm ăn kon pơlei:“Ƀơ̆t bơ̆n pơm thôn trơng sơ̆, lơ kon pơlei truh tơ̆ hnam athei ba kĭ hla bơar tĕch teh, ba ưh kơ kĭ ăn. Ba pơtho khan ăn kon pơlei lơ lou, kon bơngai bơ̆n roi năr roi lơ, teh roi tŏ sĕt, teh ưh kơ gơh chek lar char lơ ôh. Mưh tĕch teh kơnh vă chă jang sa đơ̆ng yơ. Nhen mĭnh ƀar ŭnh hnam pơlei đe nai to, tĕch bơ̆n tĕh, truh đơ̆ng rŏng chă jang ăn kơ đe lơ loh. Bơ̆n jĭ, lăp băt choh jang sa, ưh kơ băt mơdro sa, mưh tĕch teh kơnh vă đei tăh ya đơ̆ng yơ, iŏk yă kiơ mă kĕ yak pơngot rơvĕt, dơnuh hin. Nhen bơ̆n, sơ̆ jĭ mơmat tat, ưh kơ đei teh jang sa, kăl hơdrin chă jang sa, pơkom mong răk, răt dơ̆ng teh, vang năm hŏk pơhrăm tơdrong vei lăng năng tông ‘long pơtăm kơna mă đei nhen dang ei”.

Vei đei teh, mă lei pơm lơ liơ vă kon pơlei jang sa đei iŏk yoa kơjăp đơ̆ng teh ou? Atŭm hăm kon jên đơ̆ng Hơnih mong jên tơgŭm djru tơpôl ăn tŏk iŏk, ‘nhŏng Xuin oei pơma dơnuh hăm rim Công ty chehphe lơ̆m tơring, tơgŭm ăn kon pơlei tơgoăt jang hơdoi păng pơm hơtŏk jang sa iŏk yoa kơjăp.

Jĭ bơngai đang viên, bơngai kon pơlei choh jang sa hơgei lơ̆m dêh char, 'nhŏng Xuin hlôi pơtho tơbăt trong jang sa, tơgŭm ăn lơ ŭnh hnam tơnap tap kĕ yak hloh dơnuh. Mŏ Kyăh, oei lơ̆m pơlei Kdăng, tơbăt:“Gơnơm kơ Đảng, Teh đak lăng ba tơgŭm djru rơmo yŏng, pơm ăn hnam. Đei hnam kơjăp ‘lơ̆ng, ŭnh hnam hơdrin jang sa vei lăng rơmo păng đei ‘nhŏng Xuin pơtho găh pơtăm, vei lăng chehphe kơna ŭnh hnam mă yak hloh dơnuh. Sơnăm ou jei hơdrin chă pơm hnam ou”.

Ƀok Đan, Kơdră chĕp pơgơ̆r Hơnih bơ̆ jang Mặt trận Tổ quốc Việt Nam tơring Kdang, dêh char Gia Lai, tơbăt ‘nhŏng Xuin ‘noh bơngai đang viên tơnăp hloh lơ̆m tơring. Đơ̆ng rŏng hơgrop pơlei, ‘nhŏng hơnơ̆ng vang mơ̆t jang lơ̆m Khul vei lăng sơđơ̆ng pơlei.“Lơ̆m mă ‘nhŏng Xuin mĭnh mĭnh ƀar ƀar ưh kơ kĭ hla bơar ăn kon pơlei vă tĕch teh đei lơ bơngai toch kơ blĕk kơ sư, mă lei dang ei đe sư tôch bơnê kơ ‘nhŏng Xuin. Sư ưh kơ ‘nhoen hrat hrĭn, ling lang tơnăp hăm tơdrong jang, pơjing đei jơhngơ̆m đon lui yom lơ̆m kon pơlei, tơgop gĭt kăl hơnhăk tơdrong bơ̆ jang đơ̆ng Đảng, Teh đak yak truh hăm tơdrong hơrih sa yan ou. Găh choh jang sa ‘noh ‘nhŏng jĭ mĭnh lơ̆m dôm ŭnh hnam jang sa hơgei hloh lơ̆m pơlei”.

Hrei ou, lơ ŭnh hnam Bahnar oei lơ̆m pơlei Kdăng hlôi đei mir pơgar chehphe jang sa iŏk đei đơ̆ng 400 truh 500 triu hlak jên lơ̆m mĭnh sơnăm; lơ ŭnh hnam hlôi ming man hnam ‘lơ̆ng liĕm. Hăm ‘nhŏng Xuin, vei hrong teh ưh khan lăp vei đei hơnih jang sa, mă oei vei kơjăp trong jang sa đunh đai tai sơnăm ăn kon pơlei. Tơdrong tơroi kơ bơngai đang viên ou jei tơƀôh hơdăh, mưh kang ƀô̆ tơjê̆, tơklep hăm kon pơlei păng pơ̆n chiu pŭ hơnăp jang, trong bơ̆ jang đơ̆ng Đảng, Teh đak gô đei tơlĕch jang kiơ̆ ‘lơ̆ng pơjing đei dôm tơdrong tơplih hloi đơ̆ng pơlei pơla.