Tơ̆ dôm xăh sơlam Ia Rvê, Ea Bung, Buôn Đôn păng Ia Lốp, dêh char Đắk Lắk, kăn ƀô̆ tơ̆ tơring, kră pơlei, bơngai đei kon pơlei lui yom, kăn ƀô̆ pơlei pơla păng khul linh vei lăng tơring sơlam đei roi tơbăt găh tơdrong jang tơbôl, tơdrong pơm tơm teh đak, tơdrong sơđơ̆ng tơ̆ tơring sơlam teh đak; hơdai hăm 'nŏh hơtŏk đon hlôh vao găh tơdrong roi tơbăt păng vei sơđơ̆ng mang.

Dôm bơngai pơtho tơƀôh truh roi tơbăt, sek tơlang rim tơdrong kăl, chih hơmet tơdrong tơroi; băt kơnăl, sek tơlang tơdrong tơroi ưh kơ trŏ, hơlĕnh pơdăr lơ̆m mang. Tơdrong iŏk yoa kơmăy rơgei AI păng kơmăy sô̆ kŭm đei roi tơƀôh, tơgŭm khul jang roi tơbăt tơ̆ tơring kơchăng ƀiơ̆ mưh sơng iŏk păng roi tơbăt tơ̆ tơring.

Mŏ Nguyễn Thị Thi, oei tơ̆ thôn 4, xăh Ea Bung tơroi, dôm tơdrong hlôh vao, trong jang âu gơ̆h jang kiơ̆ hloi lơ̆m tơdrong roi tơbăt tơ̆ pơlei pơla: "Kiơ̆ đơ̆ng hop akŏm, kơdih kâu inh hlôh vao hơdăh ƀiơ̆ găh hơnăp jang đơ̆ng kon pơlei mưh vei lăng tơdrong sơđơ̆ng, vei lăng tơdrong pơm tơm tơ̆ tơring sơlam; atŭm hăm 'nŏh băt trong sơng iŏk, roi tơbăt trŏ ƀlep păng ưh đei mơ̆ng dôm nơ̆r tam mă băt trŏ dăh mă ưh. Đơ̆ng rŏng kơnh mưh vih tơ̆ pơlei, inh vă tơgĕch tơroi hloi lơ̆m dôm 'măng hŏk hôp chi ƀô̆, dôm 'măng hôp pơlei, pơma nuh tơpăt hăm kon pơlei păng krao hơvơn bơngai jang lơ̆m khul pơm kiơ̆ mă 'lơ̆ng khôi luơ̆t, vang vei lăng 'lơ̆ng tơdrong sơđơ̆ng păng tơdrong pơm tơm tơ̆ tơring sơlam."

Kŭm hăm 'nŏh, dôm hop akŏm kŭm pơjing tơdrong ‘lơ̆ng vă kon pơlei tơ̆ tơring sơlam truh hăm tơdrong tơroi trŏ ƀlep găh rim tơdrong tơ̆ tơring sơlam păng dôm trong jang, tơdrong tơgŭm đei ƀơm truh. Ƀok Lê Đình Quý, Phŏ Kơdră vei lăng kon pơlei xăh Ia Rvê, dêh char Đắk Lắk ăn tơbăt: " 'Nâu jĭ jơnăr vă kon pơlei gơ̆h iŏk đei tơdrong tơroi trŏ ƀlep găh rim tơdrong tơ̆ tơring sơlam, tơdrong pơvei, jang hơdoi đơ̆ng Việt Nam păng Campuchia kŭm nhen dôm trong jang, tơdrong tơgŭm ƀơm truh tơ̆ tơring sơlam. Kiơ̆ đơ̆ng noh, kon pơlei đei đon hlôh vao, đon jang tơnăp mưh vei lăng tơdrong pơm tơm kơ teh đak, vang vei kơjăp tơdrong sơđơ̆ng, pơjing tơdrong pơvei 'lơ̆ng hơiă ăn kon pơlei ƀar păh tơring sơlam."

Ƀok Nguyễn Quốc Hiệp, Phŏ kơdră Anĭh vei lăng Jŏh ayŏ kơdŏ soang, tơplŏng kơdâu păng chă tơmang lăng dêh char Dak Lăk akhan, mang oei tŏk bŏk jing mĭnh kênh tơroi tơbăt hơnơ̆ng ăn kon pơlei. Yoa thoi noh, kŭm hăm tơroi tơbăt dôm tơdrong kơtơ̆ng ang trŏ ƀlep trŭh tơring, tơdrong roi tơƀôh trong năng băt dôm tơdrong kơtơ̆ng ang ư̆h kơ trŏ kŭm đei năng jĭ mĭnh tơdrong kăl ‘năi. Sơnăm ‘nâu, hăm tơdrong pơ̆ih să khŭl jang păng trong roi tơbăt, tơdrong roi tơbăt găh jang tơbôl đei hơnhăk jê̆ ƀiơ̆ hăm kăn ƀô̆ păng kon pơlei tơ̆ tơring sơlam:

"Nhôn tơlĕch jang hrơ̆ch 'lơ̆ng truh tơ̆ kăn ƀô̆ pơlei pơla, kră pơlei, ƀok pơgơ̆r pơlei, khŭl kăn ƀô̆, bơngai jang tơm tơ̆ tơring, mă loi 'noh tơ̆ tơring sơlam. Kiơ̆ đơ̆ng hop akŏm, nhôn pơm hơtŏk đon hlôh vao ăn kăn ƀô̆, khŭl jang chĭnh trĭ păng kon pơlei tơ̆ tơring sơlam; roi tơbăt, pơtho tơƀôh dôm tơdrong pran 'lơ̆ng, dôm trong jang vă vei lăng tơdrong pơm tơm tơ̆ tơring sơlam kŭm nhen tang găn kơtơ̆ng ang kơnê̆ lơ̆m mang tơpôl hrei 'nâu."

Tơdrong hơnhăk tơdrong tơroi trŏ ƀlep truh tơ̆ pơlei pơla, kŭm hăm pơm hơtŏk đon hlôh vao, hơmet pơ ‘lơ̆ng tơdrong tơroi ăn khul jang roi tơbăt, kră pơlei, bơngai đei kon pơlei lui yom păng kăn ƀô̆ pơlei đei hơmĕng pơjing dơ̆ng minh kênh pơm gơng tơƀưh Khul kơdră pơgơ̆r tơring, khul jang kơpal hăm kon pơlei. Kiơ̆ đơ̆ng noh, kon pơlei tơring sơlam đei dơ̆ng tơdrong ‘lơ̆ng vă sơng iŏk, hơlen rim tơdrong tơroi, hơtŏk đon kơchăng, vang vei kơjăp tơdrong xơđơ̆ng tơpôl, vei lăng ‘lơ̆ng tơdrong pơm tơm kơdih kơ teh đak, pơjing trong sơlam rơngei hiôk hian.