Tơ̆ plei Đắk Snao, xăh Quảng Sơn, tơring đei teh hơlih xă hloh 4ha, ƀơm truh 79 unh hnam hăm 454 ‘nu bơngai. Đĭ đăng 79 unh hnam hlôi đei khul kơdră tơring chông tŏk tơ̆ anih sơđơ̆ng. Anih vei lăng kon pơlei dêh char Lâm Đồng roi tơbăt tơdrong krê hơmơt đơ̆ng tŏ 'mi kial kơnê̆ tơ̆ tơring âu.

Tơ̆ xăh D'ran, thong đak Cát ro tôch jăng, đak xa jơ̆ng teh tôch dêh, đak tơjroh jrăng gơng bê tông tơ̆ kueng Ga, plei Phú Thuận, pơm ăn 8 unh hnam hăm 35 ‘nu bơngai ưh gơ̆h yak vih vât. Khul kơdră tơring krao hơvơn khul grŭp, gre, kơmăy kơmŏj vang hơmet pơ 'lơ̆ng teh hơlih, pơih trong yak pơgia, chông kon pơlei lĕch đơ̆ng tơring krê hơmơt păng pơgơ̆r gak vei lăng, roi tơbăt.

Kơplăh ‘noh, hơnơ̆ng lơ̆m 2 kơsơ̆, ‘năr 19 păng 20/9, teh tơmo đơ̆ng taluy păih kông ƀât trong krang Prenn, phương Xuân Hương - Đà Lạt teh hơlih truh tơ̆ trong. Khul jang kơpal hlôi đei măt, tơƀôh trong ăn gre vih vơ̆t, iŏk gre tih chơ hut teh tơmo, pơm ‘lơ̆ng ăn bơngai păng gre yak vih vơ̆t. Tơ̆ hơnăp tơdrong krê hơmơt đơ̆ng ‘mi kial kơnê̆, Anih vei lăng kon pơlei dêh char Lâm Đồng athei rim tơring chĕng găn tơring hơmơt đei teh hơlih, ăn khul jang dơ̆ng gak, chông tơlĕch kon pơlei păng vei lăng ‘lơ̆ng tơmam yua kăl.