Ƀât oei choh hơmet teh vă pơtăm 'long keo tơ̆ groi kông Suối Dứa, plei Đồng Lãnh, xăh Phú Hòa 2, dêh char Đắk Lắk, ƀok Trần Văn Lợi, oei tơ̆ plei An Mỹ Nam, ƀôh mĭnh pôm kuăl tăng chô̆ văn, ƀŭ tơ̆ hơla teh. Lơ̆m noh đei lơ tơmam đei jâu jĭ jơ̆ng ti ƀô̆ đô̆i kơna ƀok tơroi ăn Anih vei lăng khul linh tơring. ‘Năr 21/9, Anih chĕp kơ̆l pơgơ̆r khul linh xăh Phú Hòa 2 jang hơdoi hăm Khul K51, Lăm jang Chinh trĭ, Anih chĕp kơ̆l pơgơ̆r khul linh dêh char Đắk Lắk pơgơ̆r sir chă păng kôch iŏk mĭnh kơ̆l linh lôch tang ăn teh đak.

Kŭm hăm kơting, khul jang kơpal oei chă ƀôh 13 tŏ ƀlak ao, hơbăn ƀô̆ đô̆i, ƀrôih ôp sơnĕnh, tơlŏ phao, tơlei chô̆ kuăl tăng, tơlei ƀalô… Yoa kơting đĭ ƀŭk (ôm đĭ lơ̆m tĕh bơih), kơna ư̆h pă gơ̆h iŏk set hơlen ADN. Kơting linh tŏk bŏk ‘măn răk tơ̆ Anĭh blŏk hơdơ̆r kơ đe lĭnh lô̆ch tang ăn tĕh đak kơ plei Phụng Trường 1, oei gô đe pơgơ̆r lêh pơdong, ƀŭ. 'Nâu jĭ kơ̆l lĭnh lô̆ch tang ăn teh đak mă 35 đei Khŭl K51 kôch iŏk jô̆ đơ̆ng tơlĕch tơdrong jang "500 măng năr".