VOV4.Bahnar - ‘Năr 7/6, Anih jang đảng dêh char Dak Lak jang hơ doi hăm Hnam hŏk Chinh trĭ Quốc gia Hồ Chí Minh pơ gơ̆r hop akŏm khoa hŏk hăm hơ năn “Dêh char Dak Lak akŏm jơ hngâm jang atŏk tơ iung choh jang xa kiơ̆ trong kơ jăp ‘lơ̆ng”. Tơ̆ hop akŏm, dôm bơ ngai tang măt vang pơ ma nuh găh tơ drong pran ‘lơ̆ng, tơ drong nol păng trong jang vă atŏk tơ iung choh jang xa Dak Lak kiơ̆ trong kơ jăp ‘lơ̆ng, hơ met pơ ‘lơ̆ng tơ drong ưh đei hrơ̆ch ‘lơ̆ng mưh pơm hơ tŏk kơ jă tơ mam đơ̆ng choh jang xa kơ dêh char hrei ‘nâu.

Jơ pơ ma nuh lơ̆m hop akŏm

Kiơ̆ Anih jang đảng dêh char Dak Lak, atŏk tơ iung choh jang xa kiơ̆ trong kơ jăp ‘lơ̆ng jĭ 1 lơ̆m 6 tơ drong jang tơm vă atŏk tơ iung mŭk drăm dêh char, đei chih lơ̆m tơ drong Tơ chơ̆t đơ̆ng Hop akŏm Đảng ƀô̆ dêh char ‘măng mă XVII, jăl jang 2020-2025. Tơ̆ hop akŏm, dôm bơ ngai tang măt pơ ma tơ lĕch lơ trong jang atŏk tơ iung choh jang xa hăm kơ măy kơ mŏk ‘nao nhen tơ mât yoa khoa hŏk ki thuơ̆t ‘nao, sơng iŏk jên jang, iŏk yoa dôm tơ drong jơ nei đơ̆ng kăch mang kơ măy kơ mŏk 4.0 lơ̆m tơ drong choh jang xa. Đơ̆ng nŏh bơ̆ jang hrơ̆ch ‘lơ̆ng, tŏk pran ăn Dak Lak vă atŏk tơ iung choh jang xa kơ jăp ‘lơ̆ng, bơ̆ jang đei tơ drong pơ hnŏng jang tŏk “Chŏh jang xa rơ gŏh ‘lơ̆ng, tơ ring tơ rang ‘lơ̆ng rŏ, kon pơ lei jang chŭn mir gơ̆h hơ gei”.

Dơ̆ng: Tơ blơ̆