Dêh char Dak Lăk hlôi tơlĕch bơ̆ jang hơmet ăn ‘măng pôk rơih ‘lơ̆ng hơ iă, sơđơ̆ng ƀlep tơdrong tơchơ̆t. Hơnih chĕp pơgơ̆r pôk rơih dêh char hlôi tơbăt hơdăh hơnăn 25 ‘nu bơngai pơjei pơm kơdră tang măt Kuô̆k hô̆i jăl XVI tơ̆ 5 hơnih pôk rơih vă pôk rơih iŏk 15 ‘nu kơdră tang măt Kuô̆k hôi; 141 bơngai chih hơnăn ăn pôk rơih kơdră tang măt Jơnŭm vei lăng kon pơlei dêh char tơ̆ 27 hơnih pôk rơih vă pôk rơih 84 ‘nu kơdră tang măt Jơnŭm vei lăng kon pơlei dêh char jăl XI, jăl jang 2026 - 2031. Kiơ̆ đơ̆ng yă Cao Thị Hòa An, Kơdră chĕp pơgơ̆r Jơnŭm vei lăng kon pơlei dêh char, Kơdră chĕp pơgơ̆r Hơnih bơ̆ jang pôk rơih dêh char Dak Lăk, jơ ‘năr đơ̆ng dang ei truh năr 15/3/2026 jĭ jơ ‘năr “kăl hloh” sơkơt hơdăh lơ̆m tơdrong hơmet ăn trong jang kăl kơ tơdrong pôk rơih. Kơ yuơ lơ loh, yă athei rim kâp, hơnih jang păng tơring kăl iung jang kơtang hơnăp jang ‘lơ̆ng, chĕp pơgơ̆r, pơrô̆ iung jang kơtang, sơđơ̆ng ăn tơdrong pơgơ̆r pôk rơih ƀlep tơdrong tơchơ̆t.