Tơbăt tơ̆ jơ bơ̆ jang, ƀok Lương Nguyễn Minh Triết, Bí thư Đảng dêh char Dak Lăk tơbăt, mŭk drăm-tơpôl jăl I đei sơđơ̆ng păng iŏk đei jơnei hơ iă. Trong jang muk drăm hơnơ̆ng pơih să, GRDP kiơ̆ kơjă dang ei jơnei hloh 48.400 ti hlak jên, tŏk 11,7% pơtêng hăm dôm khei ou sơnăm 2025.

Mă lei, jô̆ hơlen găh tŏk GRDP, dêh char ‘nao iŏk đei dang 7,5%; tơlĕch kon jên teh đak tơmơ̆t jang hiơ hiơ̆; bơ̆ jang hru ăn, iŏk tơvih teh lơ tơdrong vă jang oei tơnap tap; tơdrong hơmet pơ ‘lơ̆ng xek tơlang hla bơar ăn rim tơdrong vă jang tơm tim mă tơtom; bơ̆ jang pơm tơlĕch tĕch mơdro tơƀơ̆p lơ tơnap tap.

Bí thư Đảng dêh char Dak Lăk akhan, vă iŏk đei trong tơlĕch ăn tŏk 10% năm tơ lơ, tơdrong ‘meh vă chă hơvơn kon jên tơmơ̆t jang lơ̆m jăl kơnh jĭ tôch kơ lơ, kon jên bơ̆ jang dêh char ưh kơ măh. Kơ yuơ lơ loh dêh char apĭnh athei Trung ương hrôih đei trong jang kăl hơvơn kon jên jang đơ̆ng kon pơlei, pơih să kĕ đei tŏk iŏk kon jên jang ODA, adoi pơjing rơvơn hơvơn rim bơngai tơmơ̆t jên jang ‘lơ̆ng iung jang lơ̆m rim tơdrong jang kmăi kmŏk hơgei, logistics, pơm tơlĕch tơmam drăm păng rong kon tơrong kmăi kmŏk hơgei. Dak Lăk jei athei đei trong jang ‘lơ̆ng hơ iă vă xek tơlang dôm mŭk drăm rơkăh, pơjing đei kon jên tơmơ̆t jang atŏk tơ iung: “Dang ei dêh char hlôi đei trong vă jang ngăl bơih, mă lei trong vă tơlĕch jang kiơ̆ jĭ tôch tơnap tap, mă kăl tơring păh Hơlĕch, muk drăm jĭ oei tôch kơ lơ, ăn mơng ‘noh pă bĭ bu ‘meh vă mơng, tĕch ‘noh ưh kơ ăn tĕch, tơplih jing hơnih bơ̆ jang, hnam pơgang ‘noh ưh kơ trŏ lăp trong jang kơna hơpơi Trung ương hơlen đei trong jang lơ liơ mă trŏ lăp ƀiơ̆, đơ̆ng Trung ương pơchoh ăn ‘noh dêh char mă gơh tơlĕch jang lơ̆m tơdrong iok muk drăm rơkăh ou vă pơvih pơvăn ăn atŏk tơ iung ‘lơ̆ng hơ iă hloh.”

Iung pơma tơ̆ jơ bơ̆ jang, ƀok Nguyễn Thanh Nghị hôn bơnê kơtang dôm tơdrong hơdrim đơ̆ng Dak Lăk lơ̆m khei năr oei ƀĕnh ƀang tơnap tyap, mă lei dêh char kăl iung jang kơtang hloh dơ̆ng lơ̆m chĕp pơgơ̆r, mă kăl ‘noh tơlĕch kon jên tơmơ̆t jang kơ Teh đak, hơmet pơ ‘lơ̆ng rim tơdrong vă jang ưh kơ keh đang păng tơjur ŭnh hnam dơnuh. Ƀok jei pơkă, lăp đơ̆ng rŏng hơgrop, Dak Lak đei cham char ‘lơ̆ng mă lei trong nơnăm, khul jang, kon jên hu păng tơdrong kĕ tơplih kơsô̆ oei tim gan ‘lơ̆ng, pơm kơnê̆ truh tơdrong tŏk muk drăm.“Kăl dăr lăng hơlen trong jang păng kăl đei trong pơprŏ jang mă hơdăh kiơ̆ tơdrong jang ăn rim tơdrong vă jang tơm tơgop ăn tŏk mŭk drăm. Dang ei tơdrong pơprŏ vă jang lơ liơ, vă sơđơ̆ng ăn đe tơmơ̆t jên jang ‘noh khul jang lơ liơ, trong nơnăm hăm rơvơn ưh. Bơ̆n mơmat tat bơih ‘noh ‘meh vă bơngai tơmơ̆t jên jang năm tơ̆ ou lei kăl đei yă kiơ hloh kơ đe nai kơna mă hơvơn đei bơngai tơmơ̆t jên jang. Mĭnh tơdrong dơ̆ng ‘noh hơmet pơ ‘lơ̆ng tơdrong jang, mă blŭng tim mă hơvơn đei bơngai tơmơ̆t jên jang ‘noh kăl xek tơlang keh đang dôm tơdrong vă jang tim mă keh đang ‘noh ‘mơ̆i.”

Đơ̆ng dôm trong pơchoh ăn păng pơrô̆ tơ̆ jơ bơ̆ jang, trong tơlĕch ăn hăm dêh char Dak Lăk ưh khan lăp hơdrô̆ tơdrong chă apĭnh athei pơjing đei trong bơ̆ jang trŏ lăp ƀiơ̆, mă kăl hloh ‘noh tơlĕch jang kiơ̆ jơnei, hơnhăk rim trong bơ̆ jang, tơdrong tơchơ̆t đơ̆ng Đảng tơpă yak mơ̆t lơ̆m tơdrong hơrih sa. ‘Meh vă đei lơ loh, dêh char kăl tơlĕch jang kiơ̆ hloi hăm rim tơdrong jang hơdăh, trong pơprŏ iung jang trŏ lăp hăn yan ou; xek tơlang hơmet pơ ‘lơ̆ng dôm trong tơhlăk tơhlĭn, hơmet pơ ‘lơ̆ng khul jang, pơjing rơvơn vă hơvơn đei bơngai tơmơ̆t jên jang păng pơtrŭt kơtang tŏk mŭk drăm. Mưh rim tơdrong jang đei tơlĕch jang hrơ̆ch mĭnh ‘măng, atŭm hăm pơjao hơnăp jang mă hơdăh păng jang jơnei mă hơdăh, tơdrong tơchơ̆t đơ̆ng Đảng gô ưh khan lăp trong pơchoh ăn mă đei jing hơyak pran ăn atok tơ iung, tơgop ăn ba Dak Lăk kĕ atŏk tơ iung kơtang, tĕnh koăng păng kơjăp ‘lơ̆ng lơ̆m jăl truh ou kơnh.