VOV4.Bahnar - Ƀơm truh tơ drong 1,2 tơ ring bơ̆ jang kiơ̆ trong ăn oei hơ drô̆ hăm bơ ngai vih tơ̆ pơ lei xa têt Nguyên đán Nhâm Dần 2022, Dơ nŏ anih vei lăng kon pơ lei dêh char Dak Lak đei hla ar chih pơ tho ăn dôm tơ ring lê̆ ăn bơ ngai đơ̆ng nai vih tơ̆ pơ lei xa têt oei hơ drô̆, mă athei jang kiơ̆ dôm trong jang đei Anih tơm vei lăng jang pơ gang pơ tho vă tang găn jĭ COVID-19.

Đơ̆ng rŏng kơ tơ drong tơ̆ Hnam pơ gang xăh Ea Blang, thĭ xăh Buôn Hồ, Dak Lak athei 1 ‘nu bơ ngai vih tơ̆ Dak Lak xa têt, oei hơ drô̆ 7 năr mă đơ̆ng đĭ ƀet vaccine jrŭm mă 3 bơih, ‘năr 26/1, Dơ nŏ anih vei lăng kon pơ lei dêh char Dak Lak đei hla ar chih athei Anih pơ gơ̆r jang tang găn jĭ COVID-19 tơ̆ dôm apŭng, thĭ xăh, plt jăh hơ len năng, pơ tho ăn dôm anih jang, tơ ring tơ rang lê̆ tơ lĕch tơ drong hơ găt kơ dih găh tang găn jĭ COVID-19 pha hăm nơ̆r pơ tho, tơ drong hơ găt đơ̆ng Khul kơ dră tĕh đak, Anih tơm vei lăng jang pơ gang, pơm mơ mat tat ăn kon pơ lei mưh vih xa têt. Jô̆ truh pơ gê 27/1, dêh char Dak Lak đei 15.714 ‘nu bơ ngai jĭ COVID-19, lơ̆m nŏh oei đei 2.456 ‘nu bơ ngai oei hơ met jĭ păng 85 ‘nu bơ ngai lôch.

Dơ̆ng: Tơ blơ̆