GRDP 6 khei blŭng sơnăm kơ dêh char Đăk Lăk đei 7,84%. Lơ̆m 12 tơchơ̆t dơnơm, pơtơm đei 5 tơchơ̆t jang đei jơnei. Hơnih tơhlăk gah hơtŏk dang ei kơ Đăk Lăk akŏm mă tơm gah ming man păng tĕch pơdro. Truh năr 10/7, jơ̆p dêh char pơtơm asong jên jang hloh 2.900 tih hlj, đei pơhlom 30% tơdrong pơjao jên jang.

Vă keh đang tơchơ̆t hơtŏk truh 10%, 6 khei hơtuch sơnăm, GRDP kơ dêh char Đăk Lăk athei hơtŏk kơjung, lơ̆m noh gah tơdrong jang kŏng ngĭp – ming man athei jing tơdrong jang dơnơm. Ƀok Đỗ Hữu Huy, Kơdră Hơnih jang vei lăng kon pơlei dêh char Đăk Lăk pơgơ̆r hăm rim hơnih jang, rim tơring athei hơlen lăng tơchơ̆t hơtŏk tơ-iung, akŏm sek tơlang pơklaih dôm hơnih tơhlăk, chih măt hơtŏk pơm jang kiơ̆ rim jăl vă pơm trong hơlen lăng jang đei jơnei kiơ̆ pơkăp KPI.