Ƀar tơdrong jang ‘noh đei Hơnih kơdrơ̆m Kueng kơphô̆ 8, să hloh 19 hek tar, tơchĕng hơdrol kơjă blŭng a hloh 1.682 ti hlak jên; păng Hơnih kơdrơ̆m joh ayŏ, tơmang lăng kon kông Đắk Lắk, să hloh 44 hek tar, tơchĕng hơdrol kơjă blŭng a hloh 2.321 ti hlak jên. Pơđĭ 2 tơdrong jang tă kơ đei bơ̆jang kiơ̆ trong chă bơngai răt hăm kơjă lơ păng tŏk bŏk pơm đang dôm hla ar ƀơm truh. Tơ̆ Hơnih kơdrơ̆m joh ayŏ, tơmang lăng kon kông Đắk Lắk, tơdrong jang iŏk pơ ‘ngoăih teh tŏk bŏk tơƀơ̆p mơmat yua đơ̆ng 1,2 ‘nu tam mă băt hơdăh đei tơm a đơ̆ng teh, ƀơ̆t mă jên bơ̆jang oei ưh kơ măh yua đơ̆ng yak hloh akŏm jên tơmơ̆t jang.

Hơlen lăng teh tơ̆ tơring dơnâu đak Ea Nao, oei tơ ter kiơ̆ klăih song hơnih păih Hơlĕch kơ Hơnih kơdrơ̆m joh ayŏ, tơmang lăng kon kông dêh char Đắk Lắk, Kơdră Anih vei lăng kon pơlei dêh char Đỗ Hữu Huy akhan tơdrong jang hrei ‘nâu tam mă iŏk jang đĭ kơjă kăp gĭt cham char păng teh jum dăr dơnâu đak. Ƀok athei tơchĕng hơlen hơmet ming chĕng hơmet teh, hơmet ăn dôm hơnih pơvih pơvăn trŏ lăp, hơtŏk cham char ‘lơ̆ng hai, pơm jên iŏk yua vă tơmơ̆t dơ̆ng jên jang pơm anih jang kăl păng hơmet ming hơnơ̆ng tơring hai.