Kăl kơ lăng truh, dêh char athei tơring jang đang pơm hơmet ming hnam hư răm hơdrol kơ ‘năr 30/11; hơmet ăn hơnih oei pơgia sơđơ̆ng păng man ‘nao, ăn oei tơ̆ hơnih oei hle dôm ŭnh hnam đei păk hơlih, hoch hnam hơdrol kơ ‘năr 31/01/2026. Kiơ̆ kơ hla ar chih, ‘mi đĭ dă ƀiơ̆, đak đĭ och; dôm tơring athei lăng kiơ̆ tơring, mă loi ‘noh jĭ tơring hlôi đei đak lơ̆p jrŭ, tơklăh hơdrô̆, vă băt hơdăh tơdrong păng tơlĕch jang dôm hơnăp jang hơmet ‘lơ̆ng hăm jơhngơ̆m jang mă hrĕnh, đei yua.

Tơgŭm hơdrol ‘noh jĭ sơng iŏk pơđĭ dôm ŭnh hnam đei tơklăh hơdrô̆, asong tĕnh koăng phe ƀa tơmam sa, đak nhă, tơmam yua kăl: ưh kơ gơh lê̆ kon pơlei pơngot, tơngiĕt găng. Dêh char Đắk Lắk hơvơn khŭl lĭnh ƀô̆ đô̆i, kŏng an, đoàn viên druh dăm păng kon pơlei hơmet rơgoh hnam oei, hnam trưng hŏk, hnam pơgang, trong nơnăm; jăh jô̆ hơmet ming ŭnh điên, đak, viễn thông. Rim tơring athei dăr hơlen, chih jô̆ mă ƀlep hiong răm; sơng iŏk păng klăih song tơmam dŏng tơgŭm rơđăh, hơtŏ băl, ƀlep bơngai.