Kiơ̆ hơlen, bơ̆ jang chĕp pơgơ̆r, pơrô̆ jang đei tơlĕch jang kơtang, hrơ̆p mĭnh ‘măng; rim hơnih bơ̆ jang hlôi iung jang hơlen hơdăh băt hơdăh tơdrong, tơtom ƀôh, xek tơlang lơ tơdrong pơm glăi, tơgop pơm sơđơ̆ng chinh trĭ păng hơmet pơ ‘lơ̆ng jơhngơm đon lui yom đơ̆ng kon pơlei. Lơ̆m jăl jang, hloh đơ̆ng dăr lăng hơlen, dêh char ƀôh 12 ‘măng sa pơgơ̆m pơjĭp. Bơ̆ jang dăr lăng đei ƀôh 10 ‘măng đei ƀôh pơm glăi pơtruh ăn hơnih bơ̆ jang dăr lăng hơlen. Mă kăl, dêh char Dak Lăk akŏm dăr lăng, xek tơlang rim tơdrong vă jang iung jang keh đang hiơ hiơ̆, jang ưh kơ keh đunh khei ‘năr, hơmơt pơm ăn đei tơdrong hiong răm kơtang. Găh mŭk drăm teh đak đơ̆ng rŏng hơgrop, lơ̆m dêh char đei hloh 4.000 hơnih bơ̆ jang rơkăh kăl đei trong hơmet pơ ‘lơ̆ng. Bí thư Đảng dêh char Dak Lăk Lương Nguyễn Minh Triết athei rim hơnih kăl jang kiơ̆ kơjăp ‘lơ̆ng trong jang “ưh kơgơh, ưh kơpơ̆n, ưh kơ ‘meh, ưh kơ kăl sa pơgơ̆m pơjĭp”; atŏk kơtang pơtho tơbăt jơhngơ̆m đon bơ̆ jang ‘lơ̆ng, jang kiơ̆ pơkom, tơpăt păng xek tơlang keh đang hloi mŭk drăm rơkăh.