VOV4. Bahnar - Atŏk kơtang rim tơdrong jang Puih mak năm jang sơnăm 2022 vă tơgum djru kon pơlei tơnap tap đei dơ̆ng rơvơn chơt hơ iă puih mak, sơng Têt. ‘Nau mĭnh lơ̆m rim tơdrong jang đei pơma tơlĕch tơ̆ Hop akŏm pơtôch bơ̆ jang đoàn păng tơdrong jang hơdrŭh tơdăm hơ iŏh sơnăm 2021, tơlĕch tơdrong jang  2022 kơ Dơno anĭh Đoàn dêh char Dak lăk pơgơ̆r năr 17/1.

Hơdrŭh tơdăm Dak Lăk atok kơtang Tơdrong jang Puih mak năm jang vă rim kon pơlei đei Têt chơt hơ iă

Kiơ̆ đơ̆ng Dơnŏ anih Đoàn dêh char Dak Lăk hơlen, lơ̆m sơnăm au ki, bơ̆ jang tơgum djru tang găn jĭ hơbŭh Covid-19 đei hơdrŭh tơdăm Dak Lăk iung jang hơdoi tơlĕch jang tôch ‘lơ̆ng. Đơ̆ng nŏh hơvơn păng chă ƀơk ăn rơbau blăh che gom ƀŏ, đak pơgang ôp ti, leng noet tang găn đak hai tơprăh păng hơbĕn ao jang pơgang kơ jă kơ jên hlŏh 1 ti hlak jên. Dơnŏ anĭh Đoàn dêh char hlôi tơgŭm djru vă jê̆ 24.000 Kơdŭng tơmam drăm sa păng Kơdŭng pơgang ăn kon pơlei păng hơdrŭh tơdăm ŭnh hnam tơnap tap, hăm akŏp kơ jă kon jên vă jê̆  6 ti hlak jên. Atŭm hăm ‘nŏh, rim hơnĭh đoàn lơ̆m dêh char hklôi iung jang đei vă jê̆ 2.700 tơdrong jang kơ hơdrŭh tơdăm; ming man ‘nao hlŏh 119km trong nơnăm “hơdăh-jơk ƀlĭk-rơgŏh-‘lơ̆ng liĕm-‘lơ̆ng hơ iă-sơđơ̆ng”; Pơgơ̆r pơtho tơbăt pơjing tơdrong jang păng tơroi tơbăt tơdrong jang ăn rơbau ‘nu bơngai jang đoàn hơdrŭh tơdăm; tơgum djru kơ hrĕng trong jang hơdrŭh tơdăm chŏh jang sa, pơjing tơdrong jang sa.

Tơblơ̆ nơ̆r: Amazưt