Đơ̆ng rŏng hơgrop hăm Phú Yên, dêh char Đắk Lắk hle đei hơgăt teh să hloh 18.000 km², măt bơngai kon pơlei hloh 3 triu 300.000 ‘nu bơngai, pơjing đei cham char atok tơ iung pơ đĭ groi kông păng tơring hơvĕn đak. Păh Pơmơ̆t đei hơvơn găh chehphe păng rim tơmam drăm choh jang sa nhen tiu, sâu riêng, ksu, theng thôih yuăn; păh Hpơlĕch đei đak dơsĭ, dơnŏk đak dơsĭ, ka hơdang, atŭm hăm tơdrong đei hơ iă găh tơmang pơhiơ̆, mŭk drăm đak dơsĭ păng logistics. Hrei ou Đắk Lắk đei 7 tơdrong vă jang đei tơmơ̆t jên jang kơtă đơ̆ng Nhật Bản hăm akŏp kon jên tơmơ̆t jang vă jê̆ 30 triu USD. Dêh char sơkơ̆t hơdăh khei năr kơnh gô tŏk pơđĭ găh lơ păng ‘lơ̆ng rim tơdrong vă jang kơ Nhật Bản, lăng kơjăp dôm tơdrong vă jang đei kmăi kmŏk, pơjing đei kơjă tŏk păng đei vang iung jang hơdoi hơnih mơdro sa, kon pơlei tơring. Kơdră tang măt Việt Nam tơ̆ Nhật Bản hlôi tơgŭm djru tơƀơ̆p dih băl ƀar păh Khul bơ̆ jang Đắk Lắk hăm Hơnih pơtrŭt Mơdro sa Nhật Bản (JETRO) păng Hơnih tơm jang ASEAN-Nhật Bản vă hơlen tơdrong ‘meh vă jang hơdoi, tơƀôh tơbăt dôm tơdrong đei păng pơih să tơgoăt tơgoăl jang hơdoi hăm rim păh kơ Nhật Bản.