Đơ̆ng rŏng hloh 3 khei hơgrop, Dak Lăk hlôi jang keh đang 100% trong tơlĕch jang tơplih kơsô̆ tơ̆ 102 tơring, phương, hăm hô sơ trư̆k tuyên lơ̆m dêh char jang keh đang 34,5%. Hơnih tơm bơ̆ jang pơm hla bơar ƀar kâp sơng hơvơn hloh 350.000 hô sơ, lơ̆m ou 76% đei pơm keh đang kiơ̆ trư̆k tuyên. Lơ̆m dêh char đei hloh 83% kon pơlei đei ƀơk ăn tai khan hơnăn điên tư ‘lơ̆ng mă 2, vă jê̆ 80% hlôi tơmnơ̆t gơ̆h iŏk yoa. Dôm tơdrong jơnei ou tơƀôh hơdăh trong iung jang pran kơtang đơ̆ng khul kơdră chĕp pơgơ̆r tơring lơ̆m iung jang tơplih kơsô̆, lăng truh trong bơ̆ jang tơjê̆ hăm kon pơlei, jang tơpăt, gơh hơgei. Kơdră chĕp pơgơ̆r Hơnih vei lăng kon pơlei dêh char Tạ Anh Tuấn tơbăt, khei năr kơnh, atŭm hăm atŏk kơtang tơplih kơsô̆, dêh char gô akŏm khul jang pơm pơkeh rim trong tơm, mă kăl trong gre rĕnh tơƀưh Hơlĕch-Pơmơ̆t, tơƀưh hăm dơnŏk đak dơsĭ, cham gre păr păng rim trong gre rĕnh teh đak nhen Tu-Pơbăh păng Buôn Ma Thuột - Vân Phong.