Kiơ̆ tơroi ăh 'măng hop akŏm, xơnăm 2022, tơdrong jang mŭk drăm – tơpôl kơ dêh char Đăk Lăk hlôi đei lơ tơplih hơ iă. Mă lơ dôm tơchơ̆t dơnơm kiơ̆ Tơchơ̆t tơlĕch hlôi pơm jang đei jơnei. Lơ̆m noh 6 tơdrong pơkăp găh mŭk drăm hơdăh hloh kơ pơkăp tơlĕch. Kơjă tơmam drăm đei jơnei hloh 58.300 rơtăl hlj, tŏk hloh 8,9% pơtêng hăm xơnăm 2021.

Lơ tơdrong jang tŏk bŏk oei kơ 'nôh păng hơtŏk tơ iung nhen choh jang xa, rong ka hơdang, tĕch tơmam ăn teh đak đe, hơvơn tơmoi truh tơmang păng jang tĕch pơdro, pơjing anih jang mŭk drăm 'nao... adoi ƀôh hơtŏk hloh pơtêng hăm khei năr âu xơnăm xơ̆. Tơdrong pơtho pơhrăm, joh ayŏ tơpôl, jang y tê̆, tơdrong pơyua ăn tơpôl pơtoi đei tơrĕk pơgơ̆r jang tơnăp, tơpôl tơ̆ tơring đei vei xơđơ̆ng kơjăp. Atŭm hăm dôm tơdrong jang đei jơnei, dêh char Đăk Lăk duh oei minh ƀar tơdrong tơjruh nhen: pơkăp găh tơdrong pơtăm bri đei pơm jang hloh  38% đĕch. Tơdrong axong jên jang kŏng đei 29,5% pơkăp jang; tơdrong ưh kơ măh pơgang, tơdrong ưh kơ măh tơmam drăm y tê̆ tơ̆ dôm hnam pơgang kŏng adar đei hơmet pơ 'lơ̆ng pơm ăn kon pơlei pơngơ̆t kơ đon.